Лхагва гарагт Оросын цэргүүд Украины олзны цэргийн толгойг амьдаар тастаж буйг харуулсан аймшигтай дүрс бичлэг онлайн ертөнцөд тарсан нь дэлхий нийтийг цочроогоод байна.

Европын Холбооны удирдлагууд дайны гэмт хэрэгтнүүдэд хариуцлага тооцохоо амласан бол Украин дахь НҮБ-ын хүний эрхийн ажиглагчдын баг Оросын армийн харгислалыг эрс хатуу шүүмжилсэн мэдэгдэл гаргажээ.

Дүрс бичлэгийг хаана үйлдсэн нь тодорхойгүй байна. Украины эрх баригчид хохирогч хэн болохыг тогтоохоор ажиллаж эхэлжээ.

Украины ерөнхийлөгч Володимир Зеленский “Энэ дэлхий дээр хэн ч үл тоомсорлож болохгүй нэг зүйл бий. Гэтэл эдгээр араатнууд хүнийг ямар амархан алж байна вэ? Бид юуг ч мартахгүй, алуурчдыг хэзээ ч уучлахгүй” гэж ууртайгаар мэдэгдсэн байна.

Тэрбээр Оросын эзлэн түрэмгийллийн эсрэг шийдвэртэй арга хэмжээ авахыг дэлхийн улс орнуудын удирдагчдад хандан уриалжээ.

Нэг минут, 40 секундийн урттай дүрс бичлэг дээр нүүрэндээ баг зүүсэн эрэгтэй Украины дүрэмт хувцастай эрэгтэйн толгойг амьдаар нь тастаж буйг харуулсан байна.

Кремлийн хэвлэлийн төлөөлөгч Дмитрий Песков өчигдөр сэтгүүлчидтэй уулзахдаа “Юуны өмнө энэхүү аймшигтай дүрс бичлэг бодитой эсэхийг шалгах хэрэгтэй. Бид худал хуурмагаар дүүрэн ертөнцөд амьдарч байна шүү дээ” гэж хэлжээ.

Украины эрх баригчид НҮБ-ын аюулгүй байдлын зөвлөлөөс ОХУ-ыг хасахыг өчигдөр дахин уриалсан юм.

Аюулгүй байдлын зөвлөлийг энэ дөрөвдүгээр сард даргалах ээлж ОХУ-д шилжээд байгаа.

“ISIS (Исламын Улс зэвсэгт бүлэг)-ээс ч дор Орос улс НҮБ-ын аюулгүй байдлын зөвлөлийг тэргүүлж байгаа нь утга учиргүй хэрэг” гэж Украины гадаад хэргийн сайд Дмитро Кулеба сошиал хуудсандаа бичжээ.

Украины ерөнхийлөгчийн улс төрийн зөвлөх Михаило Подоляк “террористуудад буулт хийх гэсэн аливаа оролдлого” гаргахгүй байхыг дэлхийн улс орнуудад анхааруулаад Орос улсыг улам бүр тусгаарлан ганцаардуулахыг уриалсан байна.

Эх сурвалж: AFP