ОХУ энэ оны нэгдүгээр улиралд газрын тос, байгалийн хийн $15.8 тэрбумын орлогоо алдсан байна.

Нийтдээ эхний улирлын төсвийн алдагдал $29 тэрбумд хүрсэн тухай Мягмар гарагт Оросын төв телевизээр дамжуулсан засгийн газрын хуралдааны үеэр ерөнхийлөгч Владимир Путин мэдээлжээ.

Төсвийн алдагдалд бас Украины дайнтай холбоотой улам бүр өсөн нэмэгдэж буй батлан хамгаалах салбарын зардал нөлөөлсөн байна.

Гэхдээ Оросын эдийн засаг чадавх сайн байгаа, газрын тосны үнэ ханшийн эерэг чиг хандлага ойрын үед сайнаар нөлөөлнө гэдэгт итгэлтэй байгаагаа Путин энэ үеэр мэдэгджээ.

“Хоёрдугаар улирлын сүүлээр газрын тосны үнэ өсөхтэй зэрэгцэн нөхцөл байдал өөрчлөгдөх төлөвтэй байна. Энэ үеэс эхлэн төсөвт газрын тос, байгалийн хийн нэмэлт орлого орж эхэлнэ” гэж Путин хурлын үеэр хэлсэн юм.

Газрын тос, байгалийн хий бол Оросын орлогын гол эх үүсвэр.

Украины дайнтай холбоотой авсан Өрнөдийн эдийн засгийн хориг уг орлогын хэмжээг нэлээд хэмжээгээр бууруулаад байгаа.

Хэдий тийм боловч ОХУ-ын ерөнхийлөгч Владимир Путин улсынх нь эдийн засаг гадаадын хориг арга хэмжээнд тэсвэртэйгээ батлан харуулж буйг дахин дахин илэрхийлж байна.

Гэхдээ Йелийн их сургуулийн хоёр судлаач энэ долоо хоногт TIME сэтгүүлд хэвлүүлсэн нийтлэлдээ Оросын төв банк улсынхаа экспорт, импортын дэлгэрэнгүй статистик мэдээллийг нийтээс нууж, зөвхөн сонгосон тоон үзүүлэлтүүдээ харуулж буйг шүүмжлэн бичсэн юм.

Эх сурвалж: Business Insider