Украины дайныг дуусгах цаг болсон тухай Оросын хувийн зэвсэгт хүчний Вагнер группийн тэргүүн Евгений Пригожин өөрийн Телеграм хуудсандаа бичжээ.

Түүний үүсгэн байгуулсан группийн хөлсний цэргүүд Украины дорнод фронтын шугамд гол үүрэг гүйцэтгэж байгаа гэгддэг.

Пригожин энэ тухайгаа Баасан гарагт нийтэлсэн нь өчигдөр л олон улсын хэвлэл мэдээллийн хэрэгслүүдээр цацагджээ.

“Сунжирсан зэвсэгт мөргөлдөөн Оросыг задралд хүргэж болзошгүй. Хамгийн тохиромжтой хувилбар бол цэргийн тусгай ажиллагаа дууссаныг, Орос улс төлөвлөсөн зорилгодоо хүрснийг зарлах юм. Өнөөдөр бид төрийн болон нийгмийн эрх ашгийн үүднээс цэргийн тусгай ажиллагаанд цэг тавих хэрэгтэй. Сөрөг довтолгоо эхэлсний дараа фронтын нөхцөл байдал муудах эрсдэл Оросын хувьд өндөр хэвээр байгаа” гэж Пригожин бичсэн байна.

Гэхдээ тэр дайныг дуусгахын тулд Орос улс ямар нэг буулт хийх ёсгүйг анхааруулжээ. Энэ нь одоо эзлэгдээд байгаа Украины нутаг дэвсгэрийг буцааж өгөхгүй гэсэн санаа бололтой.

“Орос улс ямар ч тохиролцоог хүлээж авах боломжгүй. Асуудал зөвхөн шударга тулаанаар шийдэгдэх ёстой” гэж тэр нийтлэлдээ бичжээ.

Ням гарагт үнэн алдартны шашны улаан өндөгний баярыг тохиолдуулан Украины талд 100 орчим олзны цэргийг буцааж өгсөн тухай Вагнерын хэвлэлийн алба мэдээлсэн байна.

Дараа нь Украины ерөнхийлөгчийн тамгын газрын ажилтан Андрей Ермак улаан өндөгний баярын солилцоогоор олзлогдсон 130 цэргээ буцааж авсныг мэдээлжээ. Харин Оросын хэдэн олзны цэргийг буцааж өгсөн тухай мэдээлээгүй байна.

Эх сурвалж: Deutsche Welle