Швед улсын олон нийтийн дунд Абсолют брэндийн цагаан архинаас татгалзах хөдөлгөөн өрнөсний үр дүнд үйлдвэрлэгч нь ОХУ-д бүтээгдэхүүн экспортлохоо бүрэн зогсоожээ.

Украинд Оросын эзлэн түрэмгийлэх дайн эхэлсний дараахан буюу өнгөрсөн оны гуравдугаар сард Absolut Company бүтээгдэхүүн экспортлохоо зогсоож байсан юм.

Гэхдээ дөрөвдүгээр сард ОХУ-ын зарим экспортоо буцаан сэргээж байжээ.

Энэ шийдвэрээ Абсолютын эзэн Перно Рикард “ОХУ дахь салбарын ажилтнуудаа санхүүгийн хувьд хамгаалах” зорилготой гэж тайлбарлаж байв.

Өнгөрсөн хугацаанд Шведийн жирийн иргэд төдийгүй улс төрчид компанийн шийдвэрийг ширүүн шүүмжилж, зарим хэсэг нь бойкот зарлахыг уриалж байжээ. Тухайлбал Шведийн ерөнхий сайд Улф Кристерссон компанийн шийдвэрийг сонсоод маш их гайхаж байгаагаа илэрхийлсэн юм. Сошиал сүлжээнд хүмүүс тус компанийг “ёс зүйгүй”, “Путинд бэлэг барьсан” гэх зэргээр шүүмжилж байв.

Нийслэл Стокхольм хотын хэд хэдэн алдартай ресторан, баарууд Абсолют брэндийн бүтээгдэхүүнээр үйлчлэхээ зогсоож байжээ.

“Сүүлийн өдрүүдэд өрнөсөн үйл явдлууд Абсолют брэнд Шведийн нийгэмд ямар их нөлөөтэйг харуулж байна. Бид Шведийн ажилчид, түншүүд, хэрэглэгчид болон Шведийн нийгэмтэй олон жил үргэлжилсэн итгэлцэл, хамтын ажиллагааны ач холбогдлыг хүлээн зөвшөөрч байна” гэж Абсолют компанийн гүйцэтгэх захирал Стефани Дюрро мэдэгдсэн байна.

Эх сурвалж: AFP