АНУ-д үйлдвэрлэсэн агаарын довтолгооноос хамгаалах Patriot систем Украинд ирснийг тус улсын батлан хамгаалахын сайд Лхагва гарагт мэдээлжээ.
Ингэснээр Украины арми Оросын агаарын довтолгоог няцаах хүчин чадлаа нэмэгдүүлж байгаа юм.
Вашингтоны эрх баригчид газар-агаар ангиллын Patriot системийг Украинд илгээх шийдвэрийг өнгөрсөн оны аравдугаар сард гаргаж байв.
Уг систем нь нисэх онгоц, далавчит пуужин, богино тусгалын баллистик пуужинг устгах чадвартай зэвсэг юм. Оросын арми дээрх зэвсгүүдээр Украины иргэний байгууламжууд, эрчим хүчний дэд бүтцүүдэд үлэмж хэмжээний хохирол учруулж байгаа.
“Өнөөдөр манай Украины үзэсгэлэнт тэнгэр улам аюулгүй болж байна” гэж Украины батлан хамгаалахын сайд Олексий Резников твиттер хуудсандаа бичжээ.
Тэрбээр АНУ, Герман, Нидерланд улсуудын эрх баригчдад талархал илэрхийлсэн боловч хэдэн ширхэг хамгаалалтын систем хүлээж авсан талаараа тоо баримт дурдаагүй байна.
Сүүлийн нэг долоо хоногийн хугацаанд Украинд илгээсэн зэр зэвсгийн нэр төрлийг Германы засгийн газар Мягмар гарагт вэб хуудсандаа нийтлэхэд Patriot систем багтсан байжээ.
Өчигдөр Берлин хотод Германы гадаад хэргийн сайд Анналена Бэрбок парламентын гишүүдэд мэдээлэл өгөхдөө үүнийг бас баталсан юм.
Тус улс өнгөрсөн онд амлаж байсан дөрвөн ширхэг дунд тусгалын IRIS-T агаараас хамгаалах системийнхээ хоёр дахийг Украинд нийлүүлснийг тэр энэ үеэр мэдээлсэн байна.
Анх 2021 оны наймдугаар сард буюу Украины дайн эхлэхээс таван сарын өмнө АНУ-аас Patriot систем нийлүүлэхийг хүссэн ч татгалзсан хариу авч байснаа Резников өчигдөр мэдээлжээ.
Нэг Patriot системийг ажиллуулж, засвар үйлчилгээг гүйцэтгэхэд 90 хүртэл тооны цэрэг шаардлагатай гэж үздэг. Украины цэргүүд өнгөрсөн хугацаанд энэ чиглэлд бэлтгэгдсэн юм байна.
Patriot системийн харвагч тус бүр нь $10 сая орчим үнэтэй бол нэг пуужин нь $4 сая орчим үнэ өртөгтэй гэсэн мэдээлэл бий.
Ийм өндөр зардлаар Оросуудын ашиглаж буй Ираны хямд өртөгтэй дронуудыг устгах нь эдийн засгийн хувьд үр ашиггүй байж болзошгүйг мэргэжилтнүүд анхааруулж байгаа.
Өчигдөр бас Хятадын засгийн газар тус улсад үйлдвэрлэсэн дроныг Оросын арми Украинд ашиглаж байж болзошгүй тухай мэдээллийг эрс няцаажээ.
Хятадын худалдааны яамнаас гаргасан мэдэгдэлд тус улс дроны экспортыг хатуу хянадаг бөгөөд энхийн бус зориулалтаар ашиглахаас урьдчилан сэргийлэхэд онцгой анхаарал тавьдаг тухай өгүүлсэн байна.
Эх сурвалж: Associated Press
