ОХУ-ын гадаад хэргийн сайд Сергей Лавров өчигдөр Никарагуа улсад дөрвөн цаг саатахдаа АНУ-ын хориг арга хэмжээний эсрэг хамтран тэмцэхээр тус улсын удирдагчидтай тохиролцжээ.
Айлчлалынхаа үеэр Оросын гадаад хэргийн сайд Никарагуа улсын ерөнхийлөгч Даниэл Ортега, түүний гэргий буюу дэд ерөнхийлөгч Росарио Мурильо нартай уулзсан байна.
Энэ оны хоёрдугаар сард Никарагуагийн эрх баригчид улс төрийн хэрэгтэн 316 хүний иргэний харьяаллыг цуцалж, нутаг дэвсгэрээсээ албадан гаргасан юм.
Энэхүү шийдвэрийг гаргасан Никарагуагийн гурван шүүгч өчигдөр АНУ-ын хоригоор шийтгүүлжээ.
Никарагуагийн ерөнхийлөгч, дэд ерөнхийлөгч нар Сергей Лавровын хамт
“Террористуудыг шийтгэснийхээ төлөө манай гурван шүүгч өнөөдөр АНУ-ын хоригт багтлаа. Манай хэдэн зуун төрийн албан хаагч өмнө нь хоригоор шийтгүүлсэн байгаа. Гэхдээ бид одоо үүнээс айхаа больсон” гэж Ортега уулзалтын үеэр Лавровт хэлсэн байна.
Хариуд нь Лавров “ОХУ-д АНУ-ын хоригоор шийтгүүлэх нь Оросын эрх ашгийг хамгаалсны илрэл гэж ойлгогддог” болсныг хэлжээ.
Украинд эзлэн түрэмгийлэх дайн эхэлснээс хойш Оросын хэдэн зуун албан тушаалтан, байгууллага АНУ-ын засгийн газрын “хар жагсаалт”-д ороод байгаа.
“АНУ тэргүүтэй Өрнөдийн орнууд Украины мөргөлдөөн шиг үйл явдлыг ашиглан дэлхий дахинд ноёрхлоо тогтоохыг санаархаж байна. Бид Никарагуагийн найз нөхөдтэйгөө хамтран ийм хандлагын эсрэг тэмцэж, урьдчилан сэргийлэх болно” гэж Лавров хэлжээ.
Тэрбээр энэ долоо хоногт Латин Америкийн орнуудаар тойрон айлчилж байгаа. Никарагуагаас өмнө Бразил, Венесуэльд очсон Лавров одоо Куба улсад айлчилж байна.
Айлчлалын үеэр ОХУ-ын ерөнхийлөгч Владимир Путиний энх тайван, аюулгүй байдлыг тогтоох хичээл зүтгэлийн талаар Лавровтой хэлэлцсэнээ Ортега сүүлд дотоодын хэвлэлд ярьжээ.
ОХУ нь Никарагуад улаан буудай, автомашин нийлүүлдэг чухал худалдааны түнш юм. Цар тахлын үеэр Москвагийн эрх баригчид Спутник вакцинаараа Никарагуад тусалж байжээ.
АНУ-ын GPS байршил тогтоох системийн өрсөлдөгч ГЛОНАСС системийнхээ газрын станцыг Оросууд 2017 онд Никарагуад байгуулсан юм.
Эх сурвалж: АFP
