Хятадын төрийн тэргүүн Ши Жиньпинтэй утсаар ярьснаа Украины ерөнхийлөгч Володимир Зеленский өчигдөр орой мэдээлжээ.
Тэдний хооронд “урт бөгөөд утга учиртай” яриа өрнөснийг Зеленский сошиал хуудсандаа онцлон бичсэн байна.
Украины нутаг дэвсгэрт Оросын цэрэг халдан довтолсноос хойш Хятадын эрх баригчид уг дайнд Москваг буруутгасан байр суурь илэрхийлэхээс үргэлж зайлсхийсээр ирсэн юм. Өнгөрсөн хугацаанд тус улс Москватай эдийн засгийн хамтын ажиллагаагаа өргөжүүлсэн ч Украины дайнд ашиглах зэр зэвсэг нийлүүлэх боломжийг үгүйсгэсээр байгаа.
Дайны нэг жилийн ойтой давхцуулан Хятадын засгийн газар Украинд энх тайван байдал тогтоох 12 зүйл бүхий саналаа дэлхий нийтэд танилцуулсан юм.
Өчигдөр Хятадын гадаад хэргийн яамнаас гаргасан албан мэдэгдэлд Хятад нь хариуцлагатай том гүрнийхээ хувьд “дайныг хөндлөнгөөс хараад суухгүй, дайнд гал нэмэхгүй, дайнаас ашиг завшаан хайхгүй” гэж Ши Жиньпин хэлсэн тухай дурджээ.
Хятадын төрийн тэргүүн хямралыг зохицуулахад хүчин чармайлт гаргаж, талуудыг яриа хэлэлцээнд зуучлах сонирхолтой байгаагаа Украины ерөнхийлөгчид илэрхийлсэн юм байна.
Цагаан ордны хэвлэлийн төлөөлөгч Жон Кирби хоёр удирдагч утсаар ярьсныг “сайн зүйл” гэж тодорхойлсон ч энх тайван тогтоох бодитой алхам гарах эсэхийг хэлэхэд хэтэрхий эрт байгааг анхааруулжээ.
ОХУ-ын гадаад хэргийн яамны хэвлэлийн төлөөлөгч Мария Захарова өчигдөр хэлэхдээ Москвагийн эрх баригчид Хятадын засгийн газрын байр суурьтай ерөнхийдөө санал нийлж байгаа ч Киевийн талаас тавьж буй “бодитой бус шаардлага” энх тайван тогтооход гол саад болж байгааг шүүмжилсэн байна.
Украины тал Крымийн хойг, Донбассын бүс нутаг зэрэг 2014 оноос хойш эзлэгдсэн газар нутгаа бүрэн буцааж авах нөхцөлөөсөө ухрахгүй гэсэн байр суурьтай байгаа.
Өчигдрийн ярианы үр дүнд Хятадын засгийн газар талуудыг хэлэлцээнд зуучлах өөрийн дипломат төлөөлөгчдийг Киевт илгээж, Украины тал Бээжинд элчин сайдаа суулгахаар тохиролцжээ.
Эх сурвалж: BBC
