Өмнөд Солонгосын ерөнхийлөгч Юн Сүк Ёлын өөрийн гол холбоотон АНУ-д хийж буй төрийн айлчлал үргэлжилж байна.

Өчигдөр БНСУ, АНУ-ын ерөнхийлөгч нар “Washington Declaration” хэмээх гэрээнд гарын үсэг зурснаа зарлажээ.

Энэ гэрээ нь Умард Солонгосын цөмийн зэвсгийн аюулаас Өмнөд Солонгосыг АНУ хамгаалах тухай юм.

Өөрөөр хэлбэл Умард Солонгосын зүгээс цөмийн зэвсгээр халдсан тохиолдолд АНУ өөрийн зэвсгээр Өмнөд Солонгосыг хамгаалах амлалт авч, хариуд нь Өмнөд Солонгос цөмийн зэвсэгтэй болох санаанаасаа татгалзахаар болжээ.

Юн Сүк Ёл энэхүү гэрээг өөрийнхөө айлчлалын гол үр дүн болсныг онцолж, хоёр орны батлан хамгаалах салбарын хамтын ажиллагаа урьд өмнө байгаагүй шинэ түвшинд хүрснийг зарласан байна.

“Энэ нь БНАСАУ-ын зүгээс улам бүр нэмэгдэж байгаа аюул заналын эсрэг авч буй урьдчилан сэргийлэх арга хэмжээ юм” гэж АНУ-ын ерөнхийлөгч Жо Байден мэдэгджээ.

Шинэ гэрээ нь олон сарын турш үргэлжилсэн яриа хэлэлцээний үр дүн болохыг Вашингтоны албаны эх сурвалж мэдээлсэн байна.

Гэрээ ёсоор АНУ нь өөрийн цөмийн зэвсэгтэй шумбагч хөлгийг Өмнөд Солонгосын эрэгт байрлуулах зэргээр стратегийн зэвсгийн нөөцөө Умард Солонгосын өдөөн хатгасан үйлдлийн эсрэг ашиглахаар болжээ.

Ийм алхам 1980-аад оноос хойш хийгдээгүй байсан юм.

Сүүлийн жилүүдэд Умард Солонгосын дэглэмийн цөмийн зэвсгийн нөөц, технологи сайжрахын хэрээр Өмнөд Солонгосын аюулгүй байдал улам эмзэг асуудал болж байлаа.

Сөүлийн эрх баригчид өөрийгөө хамгаалахын тулд цөмийн зэвсэгтэй болох тухай санаа хүртэл яригдаж эхэлсэн юм.

Энэ оны нэгдүгээр сард Өмнөд Солонгосын ерөнхийлөгч Юн Сүк Ёл анх удаагаа цөмийн зэвсэгтэй болох санааг албан ёсоор илэрхийлсэн нь Вашингтоны засаг захиргааг яаралтай арга хэмжээ авахад хүргэж байжээ.

“Washington Declaration” гэрээний хүрээнд АНУ-ын цөмийн зэвсэгтэй шумбагч хөлөг сүүлийн 40 орчим жилийн хугацаанд анх удаа Өмнөд Солонгост очиж байрлахаар болж байна.

Хариуд нь Сөүлийн эрх баригчид өөрийн цөмийн зэвсэгтэй болох санаанаасаа татгалзаж, цөмийн зэвсэглэлээр хөөцөлдөхгүй байх амлалт авчээ.

Эх сурвалж: BBC