Украины Запорожье мужийн Мелитополь хотын цагдаагийн газрын дарга партизануудад алагдсан тухай эх сурвалжууд өчигдөр мэдээлсэн байна.

Олександр Мищенко гэрийнх нь үүдэнд тавьсан бөмбөг дэлбэрэх үеэр амиа алджээ. Дэлбэрэлтэд өөр хоёр цагдаа шархадсаны нэг нь сүүлд эмнэлэгт амьсгал хураасан байна.

Мищенко нь дайн эхлэхээс өмнө тус хотын нэг дүүргийн цагдаагийн дарга байсан бөгөөд өнгөрсөн онд Мелитополь хот эзлэгдсэний дараа Оросын талд дэвшин ажиллах болжээ.

Мелитополь нь Мариуполийн дараа Оросын цэрэгт эзлэгдсэн Украины хоёр дахь том хотод тооцогддог.

“Оросын талд орсон хүн бүрийн замнал тодорхой: өчигдөр урвалт, өнөөдөр үймээн, маргааш үхэл” гэж Мелитополийн дүрвэсэн захирагч Иван Федоров сошиал хуудсандаа бичсэн байна. Тэрбээр Мищенког өөрөө урваад зогсохгүй, бусад албан хаагчдаа урвахад нөлөөлсөн хүн гэж буруутгасан юм.

Аллага өчигдөр өглөөний 5:20 цагийн үед гарсныг ОХУ-ын дотоод хэргийн яам мэдээлжээ.

Москвагаас томилогдсон Запорожье мужийн захирагч Володимир Рогов цагдаагийн дарга хотод энх тайван амьдралыг тогтоохын төлөө тэмцэж явахдаа террористуудаас өмнө нь олон удаа сүрдүүлэг хүлээж авч байсныг ярьсан байна.

Дайн эхэлсэн цагаас хойш Украины эзлэгдсэн бүс нутгуудад Оросын талд ажиллаж байсан хэд хэдэн өндөр албан тушаалтнууд хорлогдсон юм.

Оросын эрх баригчид эдгээр аллагуудад орон нутгийн партизаны бүлгүүдийг буруутгадаг.

Эх сурвалж: BBC