Ням гарагт Төв Азийн хамгийн олон хүн амтай улс Узбекистанд үндсэн хуулийн зарим заалтыг шинэчлэх асуудлаар бүх нийтийн санал хураалт болж өнгөрлөө.

Хэрвээ олонх нь дэмжвэл тус улсын одоогийн ерөнхийлөгч Шавкат Мирзёев 2040 он хүртэл албан тушаалдаа үлдэх боломжтой болох юм.

Ням гарагийн оройн 8:00 цагт орон даяар санал хураах хэсгүүд хаагдсан байна. Узбекистаны сонгуулийн ерөнхий хороо санал хураалтын үр дүнг 10 хоногийн дотор танилцуулах юм.

Одоо 65 настай Мирзёев 2016 онд өмнөх ерөнхийлөгч Ислам Каримовыг нас барсны дараа ерөнхийлөгч болж байв.

Үндсэн хуулийг шинэчилснээр 35 сая хүн амтай Узбекистанд засаглал сайжирч, хүмүүсийн амьдралын чанар дээшилнэ гэж тэр ухуулж байгаа.

Гэхдээ санал хураалтын үр дүнгээс хамгийн их ашиг хүртэх хүн нь Мирзёев өөрөө гэж ажиглагчид дүгнэж байна.

Үндсэн хуулийн шинэчлэлт батлагдвал тус улсын ерөнхийлөгчийн бүрэн эрхийн хугацаа таваас долоон жил болж сунах ба Мирзёевт дахин хоёр удаа сонгогдож ажиллах боломж нээгдэнэ. Ингэвэл тэр 2040 он хүртэл Узбекистаныг захирах юм.

Санал хураалтын хэсгүүд нээгдсэнээс хойш долоон цагийн дараа сонгогчдын ирц 73.17 хувь хүрсэн байна.

Зөвлөлт Холбоот Улсыг задарснаас хойш Узбекистаныг хатуу гараар захирч байсан дарангуйлагч Каримовыг нас барсны дараа Мирзёевыг улс төрийн шинэчлэл эхлүүлэх байх гэсэн итгэл найдвар хүмүүсийн дунд төрж байсан ч хүлээлт талаар болсон юм.

Тэрбээр ерөнхийлөгч болсныхоо дараа хөвөнгийн тариаланд боолын хөдөлмөр ашиглахыг хориглох зэрэг хэд хэдэн шинэчлэлийг эхлүүлсэн ч одоо болтол улс төрийн сөрөг хүчнийг хүлээн зөвшөөрөөгүй байгаа.

Өнгөрсөн онд тус улсын өөртөө засах эрхтэй муж Каракалпакстанд иргэдийн эсэргүүцлийн хөдөлгөөн гарах үеэр хууль хүчнийхэн 21 хүний амийг хөнөөж, олон арван хүнийг баривчилсан юм.

Үндсэн хуулийн шинэчлэлд Каракалпакстаны өөртөө засах эрхийг хязгаарлах нэмэлт орсон нь үндэстний цөөнхийн эсэргүүцэлтэй тулгарсан нь энэ байв.

Үймээний дараа дээрх өөрчлөлтөөсөө Ташкентын эрх баригчид татгалзсан юм.

Эх сурвалж: AFP