Өнөөдөр дэлхийд улс орнуудын сөргөлдөөн амбиц, үл ойлголцол, хүнс тэжээлийн хомсдол, байгалийн гамшиг, олноор нь хамарсан өвчин тахал, дайн самуун, ээлж дараалан нүүрлэх болсон. Үүнээс үүдэн хүнс тэжээлийн эрэлт хэрэгцээ хором мөчөөр нэмэгдэж байна.
Энэ ертөнцийн гол хэрэгцээ болсон Эрүүл хөрс-Эрүүл хүнс-Эрүүл хүн гэсэн суурь гурван зорилт дээр суурилсан үндэсний хөдөлгөөнийг Монгол Улсын Ерөнхийлөгч У.Хүрэлсүх санаачлан эх орондоо бодитоор хэрэгжүүлэхээр ажиллаж байна.
НҮБ-ын индэрт ТЭРБУМ МОД ТАРИХ амлалт уриалга дэвшүүлж, гадаад улс орнуудтай эрүүл ХӨРС-ХҮНС-ХҮН гэсэн үндсэн гурван салбарт хамтран ажиллах санал тавьж, дотооддоо гадаадын хөрөнгө оруулалтын нөхцлийг хангах үйлдвэрлэл, хууль эрхзүйн болон бизнесийн таатай орчин бүрдүүлэх талаар ЗГ, УИХ-тайгаа хамтран чармайн ажиллаж байна.
Үнэндээ дайн самуун, байгалийн гамшиг, өвчин тахал, улс төр, эдийн засгийн хямралаас илүү гарахгүй олон улс орныг бодвол бид амгалан тайван амьдарч байна. Ажиллаж хөдөлмөрлөх хөрс нь цэвэр шимт, хүнс нь органик, хүн нь эрүүл орших бүрэн боломжтой.
Хүн төрөлхтний хүнс тэжээл, хөрс усны эрүүл цөм газар нутаг нь болох дүүрэн боломжтой. Ганцхан Монголчууд бидний хөдөлмөр зохион байгуулалт, иргэд олон нийтийн ажил хийх эрмэлзэл, сэтгэл зүтгэл энэ том зорилтод ихээхэн хамаатай.
ТҮҮНИЙ БАРИМТАЛЖ БУЙ ТӨВИЙГ САХИСАН ГАДААД ХАРИЛЦАА
Угаасаа Монгол хүн улааныг харж урваж, шарыг харж шарвах дургүй. Уламжлалт ёс зүй нь ч нэг их далдганаж дагаж давхиад байдаггүй. Буйр суурьтай, жудаг нүнжигтэй, айл хөршөө алаг үздэггүй ард түмэн. Өнөөгийн Ерөнхийлөгч У.Хүрэлсүхийн бодлого ч гадаад харилцаандаа Монгол Улс залгамж чанараа хадгалсан, олон тулгуурт, энхийг эрхэмлэсэн, идэвхтэй гадаад бодлогоо тууштай чадмаг явуулж байна.
Ертөнцийн улс орныг алагчлалгүй тэгш харьцаж, найрсаг уламжлалт харилцааг харин ч сэргээн бэхжүүлж чадаж байгааг байгааг НҮБ-ын тэргүүнээс эхлүүлээд олон орны дээд хэмжээний удирдагч нар У.Хүрэлсүхийн урилгаар айлчлан ирж байгаагаар дүгнэж болно.
Өчигдөрхөн ирээд буцсан ШХАБ-ийн нарийн бичиг, АНУ-ын ТНБД-ын орлогч, Польшийн Ерөнхийлөгч, өнөөдрөөс сураг нь гарч байгаа Францийн төрийн тэргүүн. Тэр ч бүү хэл Ромын Папын ирэх сураг Монгол орныг минь дэлхийн улс орнуудад сонирхолтой түвшинд гаргаж ирснийг илтгэж байна.
Амгалангийн зүгт хүмүүс тэмүүлдэг гэдэг. Магадгүй дэлхий нийтэд Монгол улсыг амар амгалан, энхийг эрхэмлэгч, тэгш харилцаат, олон тулгуурт найрсаг улс юм байна гэдэг ойлголтыг Ерөнхийлөгч У.Хүрэлсүхийн гадаад ертөнцөд явуулж бодлогоос олоод харчихсан хэрэг.
Өнгөрсөн хугацаанд ийм ойлголтыг өгсөн учраас Монгол Улсын Ерөнхийлөгч У.Хүрэлсүх: - "Эдийн засгаа сэргээх бодлогын хүрээнд хоёр хөршөөс гадна “Гуравдагч хөрш”-ийн оролцоог нэмэгдүүлж, эдийн засгаа төрөлжүүлэх, олон тулгуурт, зохистой бүтэцтэй болохыг зорьж байгаа.
Цаашид хөрөнгө оруулалтын бодлогоо улам тодорхой болгож, тогтвортой, тууштай, “Итгэлтэй, найдвартай, удаан хугацааны түнш байх” зарчим баримтлан, хөрөнгө оруулагчдын эрх ашгийг хамгаалах, бизнес, хөрөнгө оруулалтын орчныг сайжруулах чиглэлээр цогц шинэчлэл хийж байгаа... " гэсэн нь Монголчууд дэлхийн улс орнуудтай хөрөнгө оруулалт эдийн засгаар нээлттэй нөхөрлөе. Итгэлтэй нэр хүндтэй хамтран ажиллаж хөгжиж дэвжье гэдгээ шулуухан хэлж уриалж байгаа хэрэг юм.
О.Түвшиндэмбэрэл
Sonin.mn
