Дэлхийн хамгийн баян хүмүүсийн нэг Уоррен Баффет 92 хүрсэн өндөр настай ч хүүхэд шиг хоолны зуршилтай гэдэг.

Berkshire Hathaway компанийн гүйцэтгэх захирал, алдартай хөрөнгө оруулагч тэрбээр түргэн хоол, амттан, хийжүүлсэн ундаа байнга хэрэглэдэг юм.

Баффетын $300 тэрбумын хөрөнгө оруулалтын багцад Dairy Queen, See’s Candies, Coca Cola, Kraft Heinz зэрэг хүнсний компаниудын хувьцаа байдаг.

Ингээд түүний хэвлэлд ярьсан хоол хүнсний зуршилтай холбоотой үгнүүдээс эшлэн хүргэж байна.

• Би зургаан настай хүүхдийн дадал зуршлаар 92 нас хүрлээ. Одоохондоо ямар ч асуудал алга. Чарли (өөрийнх нь бизнес хамтрагч) 99 настай ч над шиг чөлөөтэй идэж уудаггүй. Би зургаан настайдаа л дуртай хоол хүнсээ олж авсан. Хэрвээ хэн нэгэн надад насан туршдаа брокколи идээд хэдэн жил илүү амьдарч болно гэж хэлбэл “Тэр жилээ миний наснаас хасаад дуртай зүйлээ идэх боломж олго” гэж хэлнэ (CNBC)
• Миний бодлоор аз жаргал л хүнийг урт наслуулдаг. Би кока кола ууж, хот дог идэж байхдаа аз жаргалтай байдаг (CNBC)
• Миний хоол хүнсний дөрөвний нэг нь кока кола. Би өдөрт 2,700 калор илчлэг авдаг бол үүний дөрөвний нэг нь энэ ундаа юм. Би өдөрт доод тал нь таван лаазыг уудаг. Өдөр бүр шүү. Өдрийн цагаар гурван лаазыг, орой хоёрыг уудаг (Fortune)
• Би хүний нас баралтын тоо баримтыг нягталж үзээд зургаан настай хүүхдүүдийн дунд нас баралт хамгийн бага байдгийг олж мэдсэн. Тэгээд л би зургаан настай хүүхэд шиг хооллохоор шийдэж байлаа. Миний бодлоор энэ бол хамгийн аюулгүй хооллолт (Fortune)
• Би хоол хүнсэндээ хамгийн энгийн зарчим баримталдаг. Гурван настай хүүхдийн идэхгүй байгаа хүнсийг иддэггүй (“The Snowball: Warren Buffett and the Business Life”)
• Брокколи, аспарагус, брюссель байцаа надад яг л тавган дээр арвалзаж байгаа хятад хоол шиг санагддаг. Цэцэгт байцааг хараад би бараг өвддөг. Лууванг арай гэж иддэг. Би чихэрлэг төмсөнд огт дургүй. Ийм төрлийн зарим ногооноос би хол байхыг хичээдэг. Надад хүнсний ногоо гэхээр ногоон шош, эрдэнэ шиш, вандуй л санаанд ордог. Би шпагетти, шарсан бяслагтай сэндвичэнд дуртай. Би махан татшинд дуртай ч ресторанд иддэггүй (“The Snowball”)
• Хийж байгаа зүйлдээ сэтгэл хангалуун байх тухай их ярьдаг. Хэрвээ би насаараа брокколи, брюссель байцаа идсэн бол ингэж урт наслахгүй байсан байх (2015 оны хурлын тэмдэглэл)
• Би нэг зүйлээ дахин дахин идэхээс залхахгүй. Тухайлбал би хиамтай сэндвичийг 50 өдөр дараалан өглөөний цайндаа идсэн ч чадна (“The Snowball”)
• Би хятад хоол иддэггүй. Шаардлагатай бол надад зөвхөн будаа өг. Би тавган дээрээ өнхрүүлж байгаад дараа нь өрөөндөө ороод самар идчихнэ (“The Snowball”) (Билл болон Мелинда Гэйтстэй хамт Хятадад амрахын өмнө ямар хоол идэх дуртайг нь асуухад тэр ингэж хариулж байжээ. Энэ амралтынхаа турш Баффет зөвхөн гамбургер, шарсан төмс, хийжүүлсэн ундаагаар хооллосон гэдэг)

Эх сурвалж: Business Insider