Жил бүрийн тавдугаар сарын 9-ний өдөр Оросын эрх баригчид дэлхийн хоёрдугаар дайнд Германы Нацистуудыг ялсан баяраа өргөн хүрээнд тэмдэглэдэг уламжлалтай.

Энэ өдөр нийслэл Москва хотоос гадна ОХУ-ын муж, субъект бүр тус тусын цэргийн парадыг зохион байгуулдаг.

Тэгвэл энэ жилийн ялалтын баяр урьд урьдынх шигээ болохгүй нь тодорхой болжээ.

Украины хилд ойрхон байрладаг ОХУ-ын зургаан муж нийтийн аюулгүй байдлыг хангах үүднээс ялалтын баярын парад зохион байгуулахгүй болсноо зарлаад байна.

Хамгийн сүүлд Саратов мужийн захиргаа ийм шийдвэр гаргажээ.

Өмнө нь Белгород, Курск, Воронеж, Орёл, Псков мужуудаас гадна 2014 онд ОХУ-ын бүрэлдэхүүнд орсон Крымийн хойг цэргийн парадаа цуцалж байв.

“Дайсныг өдөөн хатгахаас сэргийлэх зорилгоор Белгородын төвд энэ удаа цэргийн парад зохион байгуулахгүй” гэж тус мужийн захирагч Вячеслав Гладков өнгөрсөн сард мэдэгдсэн юм.

Ялалтын баярын парад нь Путиний засаглалын 20 гаруй жилийн хугацаанд Оросын зэр зэвсгийн хүчин чадлыг дэлхий дахинд харуулах, иргэдийн эх оронч үзлийг нэмэгдүүлэх чухал арга хэмжээ болсоор ирсэн.

Украинд дайн эхэлснээс хойш хоёр дахь ялалтын баяраа Оросын эрх баригчид тэмдэглэх гэж байна. Өнгөрсөн оны энэ өдөр Путин “Нацистууд, алуурчдад энэ дэлхийд гишгэх газар байхгүй учраас Оросын арми Украинд байлдаж байна. 1945 оных шиг энэ удаагийн ялалт ч бас биднийх байх болно” гэж хэлж байжээ.

Өчигдөр сэтгүүлчидтэй уулзахдаа Кремлийн хэвлэлийн төлөөлөгч Дмитрий Песков “Аюулаас хамгаалах албаныхан Ялалтын баярын тайван байдлыг хангахын тулд шаардлагатай бүхнийг хийж байна. Олон тооны халдлага, террорист үйлдэл зохион байгуулж байсан Киевийн дэглэм ямар нэг зүйл төлөвлөж байгаа нь мэдээж” гэж хэлсэн юм.

Украины талаас өмнө нь Оросын нутаг дэвсгэрийн гүнд дроны халдлага зохион байгуулж байсан. Энэ удаа Москва, Санкт Петербург хотуудад ийм халдлага гарахаас Кремлийн эрх баригчид ихээхэн болгоомжилж байгаа бололтой.

Москва хотын удирдлага Ялалтын баярын парадад бэлдэх зорилгоор Улаан талбайг хоёр долоо хоногийн хугацаатай хааж байгаагаа өнгөрсөн долоо хоногт зарласан юм.

Зарим албан бус эх сурвалжуудын мэдээлснээр ОХУ-ын батлан хамгаалах яам Москва, Санкт Петербург хотуудын парадын үеэрх агаарын нислэгийн үзүүлбэрийг хасах санал гаргасан гэнэ.

Аюулгүй байдлаас гадна ур чадвартай нисгэгчдийн хомсдол үүнд нөлөөлсөн гэлцэж байна.

Эх сурвалж: The Guardian