Оросын хувийн зэвсэгт хүчний компани Вагнер группийн тэргүүн Евгений Пригожин өчигдөр сошиал сувагтаа Украины зэвсэгт хүчний сөрөг давшилт эхэлсэн тухай мэдээлжээ.

Киевийн эрх баригчид эзлэгдсэн бүх газар нутгаа чөлөөлөх сөрөг давшилтыг удахгүй эхлүүлэхээ өмнө нь анхааруулж байсан юм.

“Украины армийн давшилт эхэлсэн гэдэгт би итгэлтэй байна. Фронтын шугамын дагуу тэдний үйл ажиллагаа идэвхжиж байгааг бид харж байна. Тиймээс би үүнд бүрэн итгэлтэй байгаа. Ойрын өдрүүдэд давшилт өндөр эрчимтэй үе шатандаа шилжих магадлалтай боллоо. Энэ бол хэдхэн өдрийн асуудал” гэж Вагнер группийн сошиал сувгаар Пригожин ярьжээ.

Сүүлд хийсэн мэдэгдэлдээ тэр Бахмут хотыг эзлэх тулаанд Вагнерын анги нэгтгэлүүд 230 метр урагш ахисныг мэдээлсэн юм.

Дайнаас өмнө 70,000 орчим оршин суугчтай байсан Донецк мужийн энэ хот сүүлийн 10 сарын турш ширүүн тулааны талбар болоод байгаа.

Сүүлийн байдлаар Бахмутын 2.64 хавтгай дөрвөлжин километр талбайтай газар Украины зэвсэгт хүчний хяналтад байгааг Пригожин мэдээлжээ.

Тэрбээр мэдэгдэл бүрдээ ОХУ-ын батлан хамгаалах яамны дэмжлэг хангалтгүй байгааг шүүмжилдэг. “Батлан хамгаалах яам бидэнд их бууны сум нийлүүлэхгүй байна. Бид одоо хэдхэн өдрийн нөөцтэй болсон. Тэд Вагнерын хүсэлт бүрийг алгасаж байна” гэж өчигдөр Пригожин ярьжээ.

Эх сурвалж: Reuters