Энэ долоо хоногийн Бямба гарагт Их Британийн хаан Гуравдугаар Чарльзыг ширээнд нь залах ёслол болох гэж байна.
Энэхүү түүхэн арга хэмжээнд нийтдээ 2,300 орчим зочин уригдах тооцоо гарчээ. Тэдгээрийн нэрсийг зарлаагүй ч хэн хэн ирэх нь эхнээсээ тодорхой болсон байна.
Дэлхийн 100 гаруй улсын төр засгийн тэргүүн уригдсан байна. АНУ-ын хувьд ерөнхийлөгч нь оролцох боломжгүй болсон тул тэргүүн хатагтай Жилл Байден оролцохоор болжээ. Их Долоогийн орнуудаас Францын ерөнхийлөгч Эммануэл Макрон биеэр оролцохоо мэдэгдсэн бол Герман, Италийн ерөнхий сайд нарын оронд бэлгэдлийн ерөнхийлөгч нар нь оролцох юм байна.
Мөн Их Британийн тэргүүлдэг хамтын нөхөрлөлийн орнууд болох Австрали, Канад, Шинэ Зеландын ерөнхий сайр нар ирэхээр болжээ.
Хятад улсын хувьд дэд ерөнхийлөгч Хан Зэнь ёслолд оролцохоор болсон байна.
Удирдагчид нь уригдаагүй улсуудын жагсаалтад Орос, Беларусь, Мьянмар, Афганистан, Сири, Иран, Венесуэл багтаж байгааг эх сурвалжууд мэдээлжээ.
Умард Солонгос болон Никарагуа улсуудын хувьд Их Британид суудаг элчин сайд нар нь улс орноо төлөөлж оролцох юм байна.
Дэлхийн улс орнуудын язгууртнуудаас Нидерланд, Бельги, Швед, Бутан, Монако, Японы ихэс дээдэс Лондонд ирэхээр болжээ.
Тухайлбал Япон улсын эзэн хаан Нарүхитог угсаа залгамжлах хунтайж Фүмихито, гүнж Кико нар төлөөлөх юм байна.
Мөн улс улсын овог аймгуудын удирдагчид Британийн хаан ширээний ёслолд уригдсан тухай эх сурвалжууд мэдээлжээ.
Тухайлбал Амазоны ширэнгийн уугуул овог аймгийн удирдагчид болох Уюнкар Доминго Пэас, Атосса Солтани, баруун Африкийн Гана улсын Ашанти хаан, Канадын уугуул иргэдийн удирдагч Росанна Арчибальд, Натан Обед, Кассиди Карон нар уригдсан байна.
Их Британиас нийгмийн янз бүрийн төлөөлөл 850 гаруй хүн ёслолд уригдсаны 450 орчим нь хааны шагналыг хүртэж байсан хүндтэй хүмүүс гэнэ.
Хааны үр хүүхдүүдээс язгууртны хэргэмээсээ татгалзаж, АНУ-д амьдарч буй хунтайж Харри ямар нэг үүрэг гүйцэтгэлгүй оролцохоор болжээ. Түүний гэргий Меган Маркл гэртээ үлдэхээр болсон байна.
Эх сурвалж: The Guardian