Африк тивийн Зимбабве улсыг олон жил захирсан Роберт Мугабе агсны охин гэр бүлээ салгахаар энэ оны гуравдугаар сард шүүхэд хандсан юм.
Одоо түүний өмч хөрөнгөө хуваах маргаан ид үргэлжилж байгаа бөгөөд өчигдөр BBC агентлаг Бона Мугабегийн үл хөдлөх хөрөнгийн жагсаалтыг шүүхийн материалаас олж авснаа нийтэлжээ.
Уг жагсаалтаас харвал дарангуйлагч агсны охин нийтдээ 25 үл хөдлөх хөрөнгөтэй, тэдгээрийн дотор Дубай хотод байдаг $80 саяын үнэтэй тансаг харш багтсан байна. Тэрбээр үүнээс гадна хөдөө аж ахуйн 21 ферм эзэмшдэг ажээ.
2000-аад оны эхэн үед Зимбабве улс цагаан арьст фермерүүдийн аж ахуйг хураан авч, “нэг хүнд нэг ферм” зарчмаар нутгийн иргэдэд хуваарилж байсан юм. Энэ үеэр Мугабегийн гэр бүл нэлээд олон фермтэй болсон гэдэг.
Салж буй экс нөхөр нь болох Симба Муцахуни Чикоре дээрх хөрөнгийн жагсаалтыг гаргаж, өөрийн хувийг авах хүсэлтээ шүүхэд гаргасан юм байна.
Асуудлын гол нь Бона Мугабе жагсаалтад байгаа бүх хөрөнгийг дангаараа эзэмшдэг эсэх нь эргэлзээтэй байгаа гэнэ.
Бона Мугабе эцэг Роберт Мугабегийн хамт
Түүний эцэг Роберт Мугабе 2019 онд 95 насандаа таалал төгссөн юм. Ингэхдээ тэр ямар ч гэрээслэл үлдээгээгүй гэдэг. Мугабе нь охин Бонагаас гадна хоёр хүү, нэг дагавар хүүтэй хүн байжээ.
Партизаны удирдагч асан Роберт Мугабе 1980 оноос буюу колоничлолоос салж, тусгаар тогтносон цагаас нь эхлэн 2017 он хүртэл Зимбабвег удирдсан юм.
Түүний дэглэмийг нураасан одоогийн ерөнхийлөгч Эммерсон Мнангагва өмнө нь Роберт Мугабегийн хамтран зүтгэгч байжээ.
Бона Мугабе 2014 онд онгоцны нисгэгч Чикоретэй гэрлэж, маш тансаг хурим хийсэн юм. Тэдний хуримд Африкийн хэд хэдэн орны ерөнхийлөгч нар уригдаж, телевизээр шууд дамжуулж байжээ.
Мугабегийн зөвхөн нэг хүүхдээс ийм их хэмжээний хөрөнгө ил гарсан нь Зимбабве улсын ард иргэдийг гайхшируулсан байна.
Эх сурвалж: BBC
