Хууль тогтоомжийн тухай хуульд нэмэлт, өөрчлөлт оруулж Хууль зүйн үндэсний хүрээлэнг Улсын Их Хурлын Тамгын газрын Парламентын судалгаа, сургалтын хүрээлэнтэй нэгтгэх болсонтой холбогдуулан Улсын Их Хурлын гишүүн асан О.Баасанхүү байр сууриа илэрхийллээ.
Тэрбээр, “Хуульч, хууль батлалцаж байсны хүний хувьд энэ асуудлыг зөв гэж үзэж байна. Хууль зүйн үндэсний хүрээлэн байгуулагдсан цагаасаа хойш Хууль зүй, дотоод хэргийн яамны харьяаны гэх боловч үнэндээ орхигдсон байсан. Анх байгууллагдсан агуулга нь бүдгэрээд хэдэн ном зардаг, байр түрээсэлдэг газар болсон. Учир нь уг хүрээлэн аж ахуйн тооцоотой буюу өөрийгөө санхүүжүүлэх шаардлагатай болсон тул үндсэн зорилго, агуулгаараа ажиллахад хүнд байсан бололтой. Өнөөдөр Монгол Улсын Их Хурал хууль, тогтоолын төслийг хэлэлцэн, батлах, цаашлаад хэрэгжилтэд хяналт тавих чиг үүрэгтэй гэдэг утгаараа асуудалд шинжлэх ухаанчаар судалгааны үүднээс хандах шаардлагатай. Энэ талаас нь харвал Хууль зүйн үндэсний хүрээлэн УИХ-ын харьяанд байх нь зөв. Мөн парламентын гишүүдийн дотор цөөхөн хуульчид байдаг. Тэд Засгийн газраас өргөн мэдүүлсэн хуулийн төслүүдийн “бөөс”-ийг түүхэд их цаг заруулдаг. Хуулийн төслийн утга агуулга, цэг таслал, найруулга цаашлаад шинжлэх ухаанч талаасаа ч тухайн асуудлын зохицуулалтыг бүрэн тусгаж хандаж чаддаггүй. Иймд парламентын засаглалыг бэхжүүлэхэд Хууль зүйн үндэсний хүрээлэн судалгааны чиглэлээр дэмжлэг үзүүлэх нь ихээхэн тустай болов уу гэж харж байна” гэв.