Оросын Холбооны Улсад өнөөдөр Ялалтын баярт зориулсан арга хэмжээнүүд болж байна.
Энэ хүрээнд ОХУ-ын Буриад улсын Улаан-Үд хотод Ялалтын баярын жагсаал болов. Үүнд Монгол Улсаас Зэвсэгт хүчний бие бүрэлдэхүүн оролцсон нь доорх бичлэгийн 18 дахь секундээс харагдаж байна.
Энэ талаар Батлан Хамгаалах Яам(БХЯ)-наас тодруулахад "Зэвсэгт Хүчний Жанжин Штабаас асууна уу" гэсэн юм. Харин Зэвсэгт Хүчний Жанжин Штаб "Энэ тухай тодруулаад хариу өгнө" гэсэн боловч мэдээлэл өгөхгүй байна.
Өмнө жилийн Улаан-Үдэд болсон Ялалтын баярын жагсаалд манай улсын Зэвсэгт хүчний бие бүрэлдэхүүн оролцсоныг baikal-daily.ru сайтад мэдээлж байв.
Түүнчлэн тавдугаар сарын 7-ны өдөр Жуковын талбайд нэр бүхий төрийн бус байгууллагаас "Мөнхөд дурсагдах дайчид" хэмээх жагсаалыг зохион байгуулсан.
Үүнд БХЯ оролцсон эсэхийг сэтгүүлчид өчигдөр Батлан хамгаалахын сайд Г.Сайнзоригоос тодруулахад "Дайнд амь үрэгдсэн дайчдын дурсгалыг хүндэтгэх зорилготой олон нийтийн байгууллагын төлөөллөөс тавдугаар сарын 4-нд БХЯ-нд хүсэлт тавьсан. Амь үрэгдсэн дайчдын дурсгалыг хүндэтгэх жагсаал зохион байгуулахад дэмжлэг үзүүлж, хүн хүч, хөгжим гаргаж өгнө үү гэх хүсэлт тавьсан.
Өнөөдөр дэлхий, бүс нутгийн цаг үе, цэрэг, улс төрийн байдал амаргүй байна. Цаг үе хүндхэн, сорилтын дунд дэлхий нийтээрээ амьдарч байна. Монгол Улс ч мөн ялгаагүй.
Тэр тусмаа хойд хөрш Европт дайн байлдаантай байгаа энэ цаг үед бид ийм арга хэмжээг хамтарч зохион байгуулах нь зохимжгүй гэж үзсэн. Үүнд БХЯ болон Засгийн газрын зүгээс ямар ч оролцоо байхгүй" хэмээсэн юм.
