Их Британи улс Украинд алсын тусгалын “Storm Shadow” пуужин илгээхээр болсныг өчигдөр зарлалаа.
“Оросын арми энгийн иргэдийг хөнөөж буйг бид зүгээр хараад суухгүй. Энэ бол Оросын түрэмгийллийн одоогийн нөхцөл байдалд тохирсон хариу арга хэмжээ юм” гэж Их Британийн батлан хамгаалахын сайд Бэн Уоллос өчигдөр парламентын нийтийн танхимд үг хэлэх үеэрээ мэдэгджээ.
“Storm Shadow” бол Британи, Франц улсуудын хамтран бүтээсэн зэвсэг бөгөөд 250 км хүртэл алсын тусгалтай. Өнөөдрийг хүртэл Өрнөдийн орнуудаас Украинд илгээсэн зэвсгүүдээс хамгийн хол тусгалтай нь болж байна.
The UK Defense Secretary Ben Wallace regarding the decision to send Storm Shadow cruise missiles to Ukraine pic.twitter.com/NcAuREw5Lr
— Special Kherson Cat 🐈🇺🇦 (@bayraktar_1love) May 11, 2023
Өчигдөр Украины ерөнхийлөгч Володимир Зеленский сөрөг давшилтаа хэсэг хугацаанд хойшлуулах хэрэгтэй байгааг BBC сувагт өгсөн ярилцлагадаа өгүүлжээ. Тэрбээр Өрнөдийн амласан зарим зэвсэг Украинд ирэхийг хүлээх, тэр хооронд цэрэг эрсийн амийг дэмий үрэхгүй байхыг чухалчилж байгаагаа тайлбарласан юм.
Украины тал шинэ пуужинг ОХУ-ын нутаг дэвсгэрт довтлоход ашиглахгүй гэсэн амлалтыг Их Британийн талд өгсөн тухай албаны өөр эх сурвалж мэдээлжээ.
Сүүлийн саруудад Украины фронтын нөхцөл байдал харьцангуй тогтвортой байна. Ялалтын баярын өдөр Бахмут хотыг бүрэн эзэлсэн байх Оросын төлөвлөгөө хэрэгжиж чадаагүй, эсрэгээрээ зарим байрлалаа алдсан гэх мэдээлэл ирж байгаа.
“Storm Shadow” бол агаараас газарт цохилт өгөх зориулалттай пуужин юм. Уг пуужинг Украины армид ашигладаг Зөвлөлтийн үеийн нисэх онгоцнуудтай хослуулан ашиглах ажээ.
Өчигдөр парламентад үг хэлэхдээ Бэн Уоллос шинэ зэвсгийн үр дүн нэг сарын дотор харагдахыг мэдээлсэн байна.
Эх сурвалж: Bloomberg
