Өмнөд Африкийн Бүгд Найрамдах Улсад (ӨАБНУ) суугаа АНУ-ын элчин сайд өчигдөр тус улсыг ОХУ-д зэр зэвсэг нийлүүлсэн гэдэгт итгэлтэй байгаагаа мэдэгджээ.
Ингэснээр Африк тивийн тэргүүлэх эдийн засагтай ӨАБНУ эдийн засгийн хоригоор шийтгүүлэх эрсдэлтэй болж байна.
Дээрх мэдэгдлийн дараа хөрөнгө оруулагчид үргэсний улмаас үндэсний валют ранд болон засгийн газрынх нь бондын ханш унажээ.
ӨАБНУ-ын ерөнхийлөгч Сирил Рамафоза даруй арга хэмжээ авч, дээрх мэдэгдлийн мөрөөр шалгах хараат бус ажлын хэсгийг байгуулж байгаагаа зарласан байна.
Тус улсад суугаа АНУ-ын элчин сайд Рубен Бригетийн мэдэгдсэнээр өнгөрсөн оны арванхоёрдугаар сард Оросын тэнгисийн хөлөг Өмнөд Африкийн боомтод саатахдаа зэр зэвсэг, сум хэрэгсэл ачиж явсан тухай баримт олдсон гэнэ.
“Оросын Lady R ачааны хөлөг 2022 оны арванхоёрдугаар сарын 6-наас 8-ны хооронд Саймонс Таун боомтод саатахдаа галт зэвсэг, сум хэрэгсэл ачаад буцсан гэдэгт бид итгэлтэй байна” гэж тэр өчигдөр сэтгүүлчдэд мэдэгджээ.
Өмнөд Африкийн эрх баригчид Украины дайнд төвийг сахисан байр суурь баримтлах амлалтаасаа ухарсан байж болзошгүйд АНУ-ын засаг захиргаа “маш их санаа зовж байгаа”-г тэр энэ үеэр илэрхийлсэн байна.
ӨАБНУ нь Африк тив дэх ОХУ-ын гол холбоотнуудын нэг боловч Украины дайны асуудлаарх НҮБ-ын санал хураалтуудад оролцохоос түдгэлзсээр ирсэн юм.
Тус улс энэ оны хоёрдугаар сард ОХУ, БНХАУ улсуудтай хамтарсан тэнгисийн цэргийн сургуулилалт зохион байгуулж байв. Преторийн эрх баригчид үүнийгээ ердийн төлөвлөгөөт ажиллагаа хэмээн тайлбарласан бол АНУ тэргүүтэй Өрнөдийн орнууд үүнд нь санаа зовж буйгаа илэрхийлж байжээ.
Эх сурвалж: Reuters
