Украины ерөнхийлөгч Володимир Зеленский, Германы ерөнхийлөгч Франк Уолтер Штайнмайер нар
Өнгөрсөн амралтын өдрүүдэд Украины ерөнхийлөгч Володимир Зеленский гэнэтийн айлчлалаар баруун Европын Итали, Герман, Франц улсуудад хүрэлцэн очжээ.
Тэрбээр Бямба гарагт Италийн нийслэл Ромд хүрэлцэн очиж, дараа нь Германы нийслэл Берлинд саатсан юм. Парис хотод Ням гарагийн орой Францын ерөнхийлөгч Эммануэл Макронтой зоог барьснаар Зеленскийн айлчлал өндөрлөсөн байна.
Тэрбээр Украинд дайн эхэлснээс хойш анх удаагаа Ром, Берлинд, хоёр дахь удаагаа Парист хүрэлцэн очсон юм.
Берлинд саатахдаа Зеленский энэ оны сүүлээр Өрнөдийнхний тусламжтайгаар Украины арми Оросыг ялж, эзлэгдсэн нутаг дэвсгэрээ чөлөөлөх боломжтойг мэдэгдсэн байна.
Тэрбээр Украинд үзүүлж буй зэр зэвсгийн тусламжийн хэмжээгээр АНУ-ын дараа бичигдэж буй Герман улсын эрх баригчдад энэ үеэр талархал илэрхийлсэн юм.
Зеленскийн айлчлалтай давхцуулан Берлиний эрх баригчид $3 тэрбумын шинэ тусламжийн багцаа зарлаад байгаа. Үүнд нь танк, агаарын довтолгооноос хамгаалах систем, сум хэрэгсэл багтжээ.
Зеленскийн айлчлалын үеэр Итали, Герман, Францын удирдагчид бүгд Украиныг тууштай дэмжихээ амлаж, Оросын эзлэн түрэмгийлэл Европ тивийн аюулгүй байдалд заналхийлж буйг хүлээн зөвшөөрч байв.
Зеленский айлчлалынхаа үеэр Украины сөрөг давшилт Оросын газар нутагт чиглэхгүйг амласан юм.
Бямба гарагт ОХУ-ын Брянск мужид Оросын байлдааны хоёр нисэх онгоц, хоёр нисдэг тэрэг хөөрөх үеэрээ зэрэг сүйрсэн билээ. Энэ явдал Украины хилээс 50 км зайд болсон юм. Оросын ТАСС агентлаг уг ослыг техникийн гэмтэлтэй холбон тайлбарлажээ.
Харин Украины тал уг осолд хамаагүйгээ мэдэгдээд Оросын зэвсэгт хүчин өөрөө онгоц, нисдэг тэрэгнүүдийг унагасан гэж таамаглаж байгаагаа илэрхийлсэн юм.
Өчигдөр Украины ерөнхийлөгчийн зөвлөх Михаило Подоляк сүүлийн өдрүүдэд Бахмутын зарим хэсэгт амжилттай довтолсон армийнхаа ажиллагааг сөрөг давшилтын “оршил хэсэг” гэж тайлбарлажээ.
“Энэ хавар-зуны үе маш халуун байх болно. Бид Оросын армийг сүйрэлд хүргэх үйл явдлуудыг харах болно. Үр дүнд нь тэд эзлэгдсэн нутаг дэвсгэрийг хурдтайгаар орхин гарна” гэж тэр Германы Blind сонинд ярьсан байна.
Сөрөг давшилтын цаг хугацааны талаар асуухад Подоляк “Бид энэ талаар ямар нэг мэдээлэл өгмөөргүй байна. Гэхдээ зун эхлэхэд 17 өдөр л үлдээд байна шүү дээ” гэж хариулжээ.
Эх сурвалж: The Guardian
