Дэлхийн хамгийн баян хүмүүсийн нэг, Майкрософт компанийн үүсгэн байгуулагч Билл Гэйтс өнгөрсөн Бямба гарагт Умард Аризонагийн их сургуулийн төгсөлтийн баярт оролцож, төгсөгчидтэй амьдралын туршлагаасаа хуваалцжээ.

Энэ үеэр тэр ажил, амьдралын тэнцвэрийг хадгалахын чухлыг онцолж, залуудаа ингэж чадаагүйдээ харамсаж явдгаа илэрхийлсэн байна.

“Та нарын насан дээр байхдаа би амралтыг тоодоггүй байлаа. Долоо хоногийн амралтын өдрүүдийг ч хэрэгсдэггүй байв. Эргэн тойрондоо байгаа хүмүүсийг олон цагаар ажиллахыг шахдаг байлаа” гэж Гэйтс ярьжээ.

Майкрософтыг байгуулсан эхний жилүүдэд тэр ажилтнуудынхаа хэн нь эрт харьж, хэн нь оройтож байгааг ажлын өрөөнийхөө цонхоор бүртгэдэг байсныг хүртэл дурссан байна.

Харин өнөөдөр тэр энэ нь маш буруу байсныг ойлгожээ.

“Үүнийг ухаарахад над шиг урт хугацаа зарцуулаад хэрэггүй. Хүмүүстэй харилцаагаа хөгжүүлэхэд цаг зарцуул, амжилт ололтоо тэмдэглэж сур, алдсан зүйлээ нөхөх боломж гаргаж сураарай. Шаардлагатай үедээ завсарлаж сураарай. Эргэн тойрныхоо хүмүүст энэ тал дээр хүлээцтэй хандаарай” гэж Гэйтс зөвлөжээ.

Билл Гэйтс гурван улирал суралцсаныхаа дараа Харвардын их сургуулийг хаяж, Майкрософт компаниа байгуулж байсан юм.

Өмнө нь тэр ажилтнууддаа хүмүүнлэг бус ханддаг байснаа хүлээн зөвшөөрч байсан удаатай.

2019 онд Гэйтс “Би Майкрософтод ажиллаж байхдаа хүмүүст хатуу ханддаг байсан. Энэ хандлага биднийг амжилтад хүргэсэн нь үнэн боловч нөгөө талаар бас хэрээс хэтэрч байсан” гэж блогтоо бичиж байжээ.

Бямба гарагт хэлсэн үгэндээ Билл Гэйтс хүн амьдралынхаа турш суралцаж, шийдвэрээ байнга өөрчилж байх ёстой тул ирээдүйг хэтэрхий хүндээр төсөөлөх хэрэггүйг бас зөвлөсөн байна.

“Одоо та нар ирээдүйн ажил, амьдралынхаа талаар зөв шийдвэр гаргах гэж маш их дарамттай байгаа байх. Магадгүй энэ шийдвэр нэг удаагийнх гэж бодож байгаа. Гэхдээ тийм биш. Маргааш, эсвэл ирэх арван жилийн хугацаанд хийх зүйл чинь чиний насан туршдаа хийх ажил биш юм” гэж тэр хэлсэн байна.

Эх сурвалж: Business Insider