Оросын хувийн зэвсэгт хүчний Вагнер группийн босс энэ оны нэгдүгээр сард ОХУ-ын албан ёсны армийн анги нэгтгэлүүдийн байрлалын мэдээллийг өгсний хариуд Бахмут дахь зарим байрлалаасаа ухрахыг Украины талд санал болгосон тухай баримтыг Вашингтон Пост сонин Пентагоны нууц эх сурвалжаас олж авснаа мэдээлжээ.
Дээрх баримтад өгүүлснээр Украины тагнуулын албаны хоёр эх сурвалж Евгений Пригожин нэг бус удаа ийм санал тавьж байсныг баталсан байна.
Гэхдээ Пригожинд итгээгүй Украины тал саналыг хүлээж авахаас татгалзсан гэнэ. Үүнээс гадна Оросын армийн ангиуд сумны дутагдалтай байгаа тул Крымийн хил хүртэл давшихыг тэр Украины талд зөвлөж байсныг дээрх баримтад өгүүлсэн байна.
Вашингтон Пост сонин энэ мэдээгээ Ням гарагийн орой нийтэлсэн юм. Даваа гарагт Пригожин сошиал хуудсаараа үүнийг няцаажээ.
Кремлийн хэвлэлийн алба бас Вашингтон Постын мэдээг “зохиомол зүйл” хэмээн үгүйсгэсэн юм.
Украины дайны хамгийн урт, хамгийн ширүүн тулаан өнөөдөр Донецк мужийн жижиг хот Бахмутад үргэлжилж байгаа.
Энэ хотын төлөө тулааны Оросын талын ажиллагаанд Вагнер группийн ангиуд тэргүүлэн оролцож байна.
Вагнер группийн үүсгэн байгуулагч Евгений Пригожин сум хэрэгсэл хангалттай нийлүүлдэггүй, байлдааны ажиллагаанд нь дэмжлэг үзүүлдэггүй гэсэн шалтгаанаар ОХУ-ын батлан хамгаалах яамны удирдлагуудыг байнга шүүмжилж байгаа.
Сүүлийн өдрүүдэд Бахмутын ойролцоо фронтын шугамд нэлээд өөрчлөлт гарсан тухай хоорондоо зөрүүтэй мэдээллүүд дайтагч талуудаас ирсээр байна.
Тухайлбал Украины тал Оросын цэргийн зарим байрлалыг эзэлсэн тухай мэдээлсэн бол Вагнер болон ОХУ-ын батлан хамгаалах яам Украины довтолгоог амжилттай няцаасан тухайгаа мэдээлсэн юм.
Эх сурвалж: Aljazeera
