Мягмар гарагийн шөнө Оросын талаас томоохон агаарын довтолгоо явуулах үеэр зургаан ширхэг дуунаас хурдан пуужинг устгаснаа Украины арми мэдээлжээ.
Энэ нь юутай ч харьцуулшгүй хүчирхэг зэвсэг гэгдэж байсан Кинжал пуужинг анх удаа ийм олноор нь устгасан тохиолдол болж байна.
Мөн Украинд нийлүүлсэн Өрнөдийн агаарын довтолгооноос хамгаалах системийн чадварыг харуулсан явдал болж байгаа юм.
Мягмар гарагийн шөнө Оросын талаас нийт 18 пуужинг Украины нийслэл Киев хот руу харважээ. Тэдгээрийн зургаа нь дууны хурднаас дээд тал нь 10 дахин хурдтай Кинжал пуужин байсан гэнэ.
Бүх 18 пуужинг байд хүрэхээс нь өмнө амжилттай устгаж чадсанаа Украины армийн ерөнхий командлагч Валерий Залужный мэдэгджээ.
Устгагдсан пуужингуудын үлдэгдэл хотод унах үеэр гурван хүн шархадсан тухай Киев хотын эрх баригчид мэдээлсэн байна.
“Богино хугацаанд хамгийн олон пуужин харвасан гэдэг утгаараа энэ удаагийн довтолгооны нягтрал онцгой байлаа” гэж Киевийн цэргийн тойргийн командлагч Сергей Попко сошиал хуудсандаа бичжээ.
Өчигдрийн агаарын довтолгоонд ашигласан зургаан Кинжал пуужинг нисэх онгоцноос, есөн Калибр далавчит пуужинг Хар тэнгис дэх хөлгөөс, гурван Искандер пуужинг газраас харвасан юм байна.
Энэ сарын эхээр Украины арми Киев хот руу харвасан нэг Кинжал пуужинг анх удаа АНУ-ын Patriot системээр устгаснаа зарлаж байв.
Үүнээс өмнө Оросын дуунаас хурдан зэвсгийг Patriot агаарын довтолгооноос хамгаалах системээр устгасан тохиолдол гараагүй бөгөөд зөвхөн онолын хувьд боломжтой гэж үздэг байжээ.
Ганцхан Кинжалыг устгасан нь азтай тохиолдол байж болох ч зургаан ширхгийг нэг дор устгасан нь Patriot системийн чадварыг бодитой харуулсан явдал гэж мэргэжилтнүүд дүгнэж байна.
Оросын хамгийн орчин үеийн зургаан зэвсгийн нэг гэгддэг Кинжал пуужинг 2018 онд ОХУ-ын ерөнхийлөгч Владимир Путин танилцуулахдаа дэлхийд эгнэшгүй хүчтэйг нь магтаж байлаа.
Уг пуужин нь ердийн болон цөмийн цэнэгт хошууг дууны хурдаар 2,000 хүртэл километр зайд хүргэх чадалтай гэгддэг.
Оросын арми энэхүү шинэ зэвсгээ анх удаа Украины дайнд хэрэглэж байгаа юм.
Удахгүй эхлэх Украины сөрөг давшилтыг угтуулан Оросын арми агаарын цохилтуудаа эрчимжүүлсэн юм.
Сүүлийн үеийн довтолгоонд ашигласан пуужин, дронуудын ихэнхийг Өрнөдийн илгээсэн агаараас хамгаалах системээр устгаж чадсанаа Украины арми мэдээлсээр байна.
Эх сурвалж: Reuters
