Украины дайнтай холбогдуулан Оросын эсрэг зарласан Өрнөдийн эдийн засгийн хориг арга хэмжээнд нэгдэх санаа Төв Азийн зарим орнуудаас цухалзах болсныг ОХУ-ын гадаад хэргийн дэд сайд Михаил Галузин өчигдөр анхааруулжээ.
Тэрбээр ОХУ-ын Томск хотод Валдайн клубээс зохион байгуулж буй Төв Азийн орнуудын гуравдугаар чуулганд оролцохдоо энэ талаар ярьсан юм байна.
“Дан нэг талын эдийн засгийн хоригийг хууль бус үйлдэл гэдэг дээр санал нэгдэж байгаа ч Төв Азийн зарим орнууд учирч болох эрсдэлийг үл харгалзан Өрнөдийн хориг арга хэмжээнд нэгдэхэд бэлэн байгаагаа янз бүрээр илэрхийлэх боллоо” гэж Галузин энэ үеэр ярьжээ.
Төв Азийн орнуудад хуучин Зөвлөлтийн бүрэлдэхүүнд багтаж байсан таван "стан" улс багтдаг.
Хамтын Аюулгүй Байдлын Гэрээний Байгууллага, Евразийн Эдийн Засгийн Холбоо, Тусгаар Улсуудын Хамтын Нөхөрлөл зэрэг бүс нутгийн хамтын ажиллагаануудын хүрээнд харшлаагүй тохиолдолд Орос улс ямар ч улс орны гадаад болон дотоод бодлогыг заах ёсгүйг Галузин нэмж хэлжээ.
Гэхдээ тэр “Оростой харилцах харилцаагаа зохиомлоор муутгах нь Өрнөдийн хоригоор дам шийтгүүлэхээс ч илүү хор уршигтайг эдгээр орнуудын удирдагчид ойлгож байгаа гэдэгт бид итгэлтэй байна” хэмээн анхааруулсан байна.
Валдайн клубээс зохион байгуулсан энэ удаагийн чуулган “Орос ба Төв Ази: Өөрчлөгдөж буй дэлхий ертөнцтэй хөл нийлүүлэх нь” сэдвийн дор зохион байгуулагдаж байгаа юм.
Эх сурвалж: ТАСС