Киргизстан улсын шүүх Мягмар гарагт Украины эсрэг Оросын талд хөлсөөр байлдсан иргэндээ 10 жилийн хорих ял оноожээ.

Ял сонссон 32 настай эрэгтэй ОХУ-ын иргэний паспорт авах нөхцөлтэйгөөр өнгөрсөн оны зургаадугаар сараас арваннэгдүгээр сарын хооронд сарын 180,000 рублийн ($2,250) цалинтай Украины Донбассын бүс нутагт алба хаасан юм байна.

Киргизстан улсын Жалал-Абад нутгийн уугуул тэрбээр Москвад ажил хайж байхдаа Луганскийн Бүгд Найрамдах Улс гэгддэг Украины салан тусгаарлагдсан бүс нутгийн засаг захиргаатай гэрээ байгуулж, хөлсөөр фронтын шугам руу явж байжээ.

Киргизийн шүүх анх удаа Украины дайнд оролцсон иргэнээ шийтгэсэн нь энэ болохыг “Кылым Шамы” хүний эрхийн байгууллагын тэргүүн Гулшаир Абдирасулова өчигдөр мэдээлсэн байна

Зөвлөлтийн бүрэлдэхүүнд байсан Төв Азийн улс орнуудын иргэд ажил хөдөлмөр эрхлэхээр ОХУ-ыг олноороо зорьдог. Сүүлийн үед Москвагийн эрх баригчид болон хувийн зэвсэгт хүчний Вагнер групп эдгээр цагаач ажилчдыг элсүүлж, Украины дайнд явуулах бодлого түлхүү барьж байгаа гэсэн мэдээлэл бий.

Харин Төв Азийн улсуудын эрх баригчид иргэддээ Украины дайнд явахгүй байхыг дахин дахин анхааруулж байгаа.

Сүүлийн саруудад Украины фронтод Оросын арми болон Вагнерын хүчний бүрэлдэхүүнд байлдаж байгаад алагдсан Киргизстаны иргэдийн тоо хэдэн аравт хүрсэн тухай эх сурвалжууд мэдээлж байна.

Эх сурвалж: AFP