Тайзны уран бүтээлдээ Ши Жиньпиний хэлсэн үгийг ашиглаад буруудсан Хятадын хошин урлагийн хамтлаг 14.7 сая юаниар ($2.1 сая) торгуулжээ.
Shanghai Xiaoguo Culture Media Co хошин урлагийн компани болон түүнд харьяалагддаг жүжигчин Ли Хаоши ийм шийтгэл хүлээсэн юм байна.
Компани торгуулийг хүлээн зөвшөөрч, Ли Хаошитай байгуулсан гэрээгээ цуцалж буйг өчигдөр зарлажээ.
Бямба гарагт Бээжин хотод хийсэн тоглолтынхоо үеэр Ли өөрийн тэжээж өсгөсөн хоёр нохойн тухай ярихдаа 2013 онд БНХАУ-ын дарга Ши Жиньпиний зэвсэгт хүчиндээ хэлсэн уриа үгийг ашигласан юм байна.
“Бусад ноход өхөөрдөм хөөрхөн харагддаг байтал энэ хоёр нохойг харахаар “Ялахын төлөө тэмц, үлгэр жишээ зан төлөвийг бий болго” гэсэн үг л санаанд орох юм” гэж Ли энэ үеэр хошигнож байжээ.
Ши Жиньпин 2013 онд Хятадын Ардын Чөлөөлөх Армийн анги нэгтгэлүүдийн бэлтгэлтэй танилцахдаа ийм уриаг дэвшүүлж байсан юм байна.
Хятадын Соёл Урлагийн яамны Бээжин дэх салбар зөвлөл “Ардын Чөлөөлөх Армийн сүр жавхланг гутаахдаа Хятад улсын нийслэлийг тайз болгон ашиглахыг бид ямар ч хувь хүн, байгууллагад зөвшөөрөхгүй” гэж мэдэгдэлдээ өгүүлжээ.
Торгуулийн 1.32 сая юань нь дээрх тоглолтоос олсон хууль бус орлого юм байна. Үлдсэн 13.35 сая юань нь тухайн компанид оноосон торгуулийн шийтгэл ажээ.
Shanghai Xiaoguo компанийн Бээжин хотод үйл ажиллагаа явуулах эрхийг тодорхойгүй хугацаагаар цуцалсан байна.
Жүжигчин Ли өөрийн Вэйбо хуудсанд “Би хийсэн үйлдэлдээ маш их харамсаж, ичиж байна. Хариуцлагаа хүлээн уран бүтээлээ завсарлаж, гүн гүнзгий тунгаан бодож, дахин суралцах болно” гэж бичжээ.
Удалгүй түүний 136,000 гаруй дагагчтай Вэйбо сошиал хуудас хаагдсан байна.
Эх сурвалж: BBC
