Дуунаас хурдан зэвсгийн нууц технологийг задруулсан хэрэгт сэжиглэгдсэн гурван эрдэмтэнд “эх орноосоо урвасан” гэх ноцтой хэрэг үүсгэн шалгаж байгааг Кремлийн хэвлэлийн алба баталжээ.
Лхагва гарагт сэтгүүлчидтэй уулзахдаа Кремлийн хэвлэлийн төлөөлөгч Дмитрий Песков баривчлагдсан нөхдөө өмгөөлсөн хэсэг эрдэмтдийн ил захидлын талаар мэдэж байгаа ч уг ноцтой хэрэг одоо ОХУ-ын аюулаас хамгаалах төв байгууллагын шалгах асуудал болсныг мэдээлсэн байна.
Даваа гарагт олон нийтэд хүргэсэн ил захидалдаа хэсэг эрдэмтэд Анатолий Маслов, Александр Шиплюк, Валерий Звегинцев нарыг буруугүй гэж үзэж байгаагаа илэрхийлээд тэднийг баривчилсан явдал нь Оросын шинжлэх ухааны нийт салбарын нэр төрийг унагасан хэрэг болохыг учирласан байв.
“Тэднийг эх оронч, сэжиглэгдэж байгаа хэргийг үйлдэх боломжгүй, зөв хүмүүс болохыг бид сайн мэднэ” гэж эрдэмтэд захидалдаа бичжээ.
Шиплюкийг өнгөрсөн оны наймдугаар сард, Масловыг долдугаар сард баривчилсан тухай хэвлэлүүд мэдээлж байсан бол Звегинцев баривчлагдсан нь Даваа гарагт тодорхой болсон юм.
ОХУ-ын эрх баригчид дэлхийд эгнэшгүй хүчирхэг, дууны хурднаас 10 хүртэл дахин хурдтай зэвсэг бүтээснээ 2018 онд зарлаж байв.
Сүүлийн өдрүүдэд энэхүү зэвсгийн талаар мэдээлэл дэлхий дахины анхаарлын төвд ороод байгаа.
Мягмар гарагт Украины эрх баригчид нэг шөнийн дотор зургаан ширхэг дуунаас хурдан Кинжал пуужинг устгаж чадсанаа зарласан билээ. Оросын тал үүнийг няцааж байгаа.
2012 онд Маслов, Шиплюк нар дуунаас хурдан пуужингийн дизайны туршилтын үр дүнг Францын Тур хотод болсон семинарын үеэр танилцуулж байжээ.
Баривчлагдсан гурван эрдэмтэн нь 2016 онд хэвлэгдсэн “Hypersonic Short-Duration Facilities for Aerodynamics Research at ITAM, Russia” номыг зохиогчдын бүрэлдэхүүнд багтаж байв.
Өмгөөлж захидал бичсэн эрдэмтэд нь баривчлагдсан гурван эрдэмтэнтэй хамт Новосибирск хот дахь С.А.Христиановичийн нэрэмжит Онолын болон Хэрэглээний Механикийн Хүрээлэнд ажилладаг юм байна.
Тэд захидалдаа баривчлагдсан хамтрагчдынхаа хувь заяанд санаа зовоод зогсохгүй, цаашид яаж ажлаа үргэлжлүүлэхээ ойлгохгүй болоод байгааг тайлбарлажээ.
Өөрөөр хэлбэл тэдний ямар үйлдэл “эх орноосоо урвасан” хэрэгт сэжиглэгдэх шалтгаан болох нь тодорхойгүй болсныг бичсэн байна.
Өчигдөр сэтгүүлчидтэй уулзахдаа Песков “Бид эрдэмтдийн бичсэн захидлыг уншсан. Гэхдээ одоо энэ хэргийг Оросын тусгай албад шалгаж байгаа. Энэ бол тэдний ажил. Маш ноцтой асуудал яригдаж байгаа” гэж хэлжээ.
Эх сурвалж: Reuters
