Японы Хирошимад болсон Их Долоогийн дээд чуулганд хэд хэдэн улсын удирдагч урилгаар оролцсоны нэг нь Бразилын ерөнхийлөгч Луйз Инасио Лула да Силва байсан юм.
Чуулганы бас нэг хүндтэй зочин болсон Украины ерөнхийлөгч Володимир Зеленский бараг бүх удирдагчидтай ганцаарчлан уулзсан байна.
Харин тэр Бразилын ерөнхийлөгчтэй уулзаж чадалгүй нутаг буцжээ.
“Би энд ирсэн бараг бүх удирдагчидтай уулзлаа. Тэд бүгд өөр өөрийн шахуу хуваарьтай байсан тул би Бразилын ерөнхийлөгчтэй уулзаж амжсангүй” гэж Зеленскийн өчигдөр хэвлэлийн хурлын үеэр хэлсэн юм.
Харин Даваа гарагт нутаг буцахынхаа өмнө сэтгүүлчидтэй уулзахдаа Лула да Силва үүнд бухимдаж байгаагаа илэрхийлжээ.
“Би түүнтэй төлөвлөсөн зүйлээ ярилцаж чадаагүйдээ харамсах биш, харин бухимдалтай байна. Зеленский насанд хүрсэн хүн. Юу хийхээ мэдэж байгаа” гэж тэр үг хаясан байна.
Бразилын ерөнхийлөгчийн баг Зеленскийтэй хийх уулзалтыг Ням гарагийн үдээс хойш төлөвлөж байжээ. Гэтэл Зеленский төлөвлөсөн хугацаанаас нэлээд хоцорч ирсэн байна.
Энэ үед Силвагийн дараагийн ажил давхацсан тул тэд уулзаж чадаагүй ажээ.
Хирошимагаас Зеленский ганзага дүүрэн буцсан юм. Тэрбээр Их Долоогийн удирдагчдаас урт хугацаанд дэмжих амлалт авч, удаан яригдсан F-16 сөнөөгч нисэх онгоцоо хүлээж авахаар болсон.
Тэр бас ОХУ-ын газрын тосны томоохон худалдан авагч болсон Энэтхэгийн ерөнхий сайд Нарендра Модигоос нааштай үг сонсож чадсан юм.
Оросын Украинд явуулж буй дайны нэг санхүүжүүлэгч болсон хэмээн шүүмжлүүлж байгаа Моди уулзалтын үеэр дайныг дуусгахын тулд “чадах бүхнээ хийх” амлалтыг Зеленскийд өгч байв.
“Би таны зовлон шаналлыг ойлгож байна” гэж Моди энэ үеэр Зеленскийд хэлсэн юм.
Харин Бразилын ерөнхийлөгч өнөөдөр ярихдаа Зеленский, Путин хоёрын хэн хэн нь дайныг дуусгах хүсэлгүй байгааг шүүмжилжээ.
Тэрбээр зөрчилдөөнийг энхийн замаар шийдвэрлэхэд зуучлагчийн үүрэг гүйцэтгэх сонирхолтой байгаа юм.
Зүүний үзэлтэй ахмад улс төрч Силва өмнө нь нэг удаа АНУ-ын засаг захиргааг “дайныг өөгшүүлэгч” хэмээн шүүмжилж байжээ.
Харин Цагаан ордон өөрийг нь “Орос, Хятадын суртал нэвтрүүлгийг давтагч тоть” гэж шүүмжилсний дараа Силвагийн байр суурь харьцангуй зөөлөрсөн гэдэг.
Эх сурвалж: AFP
