Украины талаас хил давж ирсэн хорлон сүйтгэгч бүлэгтэй Белгород мужийн нутагт тулалдаж байгаагаа Оросын албаныхан өчигдөр мэдээлжээ.
Москвагийн эрх баригчид Украины дайн эхэлсэн цагаас хойш тус улстай хил залгаа Белгород мужид “терроризмтой тэмцэх дэглэм” тогтоогоод байгаа юм. Өмнө нь 1999-2009 онуудад Чеченьд ийм дэглэм тогтоож байв.
Тус мужид өрнөж буй үйл явдлын талаар ерөнхийлөгч Владимир Путинд илтгэсэн тухай Кремлийн хэвлэлийн алба мэдээлжээ.
Галын шугамаас иргэдийг нүүлгэн шилжүүлэх ажлыг эхлүүлснээ Белгород мужийн захирагч Вячеслав Гладков мэдээлсэн байна.
“Нөхцөл байдал маш хүнд байна. Нутгийн оршин суугчдын ихэнхийг нүүлгэн шилжүүлсэн. Манай зэвсэгт хүчин ойрын хугацаанд үүргээ биелүүлж дуусна гэдэгт би итгэлтэй байна” гэж Гладков ярьжээ.
Путиний дэглэмийг эсэргүүцэгч “Оросын Эрх Чөлөөний Легион” нэртэй зэвсэгт бүлэг Белгородын нутаг дэвсгэрт нэвтэрснээ хүлээсэн байна.
Тус бүлгийн Телеграм хуудсанд нийтлэгдсэн дүрс бичлэгт цэргийн дүрэмт хувцастай хүн “Орос улс эрх чөлөөтэй болно! Үр хүүхдүүдээ амар амгалан, эрх чөлөөтэй орчинд өсөж торниулахыг бид хүсэж байна” гэж ярьжээ.
Тэд Белгород мужийн Козинка, Грайворон хоёр тосгоныг эзлэн авснаа энэ үеэр мэдээлсэн байна.
Харин Украины эрх баригчид Белгородод болж буй үйл явдалтай холбоогүйгээ илэрхийлжээ.
“Украин улс Оросын Белгород мужид өрнөж буй үйл явдлыг анхааралтай ажиглаж байна. Гэхдээ манай тал үүнд ямар ч оролцоогүй. Тоталитар дэглэмтэй улс орны цорын ганц хөдөлгөгч хүч партизаны хөдөлгөөн байдаг шүү дээ” гэж Украины ерөнхийлөгчийн зөвлөх Михаило Подоляк хэлсэн байна. Өөрөөр хэлбэл үүнийг тэр Оросын партизануудын үйл ажиллагаа гэж тайлбарлажээ.
Өнгөрсөн долоо хоногийн Бямба гарагт Оросын хувийн зэвсэгт хүчний Вагнер групп Бахмут хотыг бүрэн хяналтдаа авсныг зарласан билээ.
Гэхдээ Украины эрх баригчид тус хотын дэргэдэх тулаан дуусаагүйг мэдэгдсээр байна. Украины зарим эх сурвалж үүнийг Оросын цэргийн хүчийг “урхинд оруулах” зорилготой гэж тайлбарласан юм.
Ойрын өдрүүдэд Оросын арми Украины хотуудад агаарын цохилтоо үргэлжлүүлсээр байна. Даваа гарагийн шөнө Оросын талаас Украины Днипро хот руу 16 пуужин, 20 дроноор довтолжээ.
Эх сурвалж: AFP
