Даваа гарагт Украины талаас Белгород мужид нэвтэрсэн зэвсэгт бүлгийг устгаж, хилээр хөөн гаргаснаа ОХУ-ын батлан хамгаалах яам өчигдөр мэдээлжээ.
Энэ нь Украинд дайн эхэлсэн цагаас хойш Оросын нутаг дэвсгэрт гарсан хамгийн ноцтой халдлага байлаа. Өөрсдийгөө Чөлөөт Оросын Легион гэж нэрлэсэн зэвсэгт бүлэг Даваа гарагт ОХУ-ын хилээр нэвтэрч, Белгород мужийн зарим тосгоныг эзэлснээ зарлаад байв.
Үүний улмаас Оросын эрх баригчид Белгород мужид “терроризмын эсрэг дэглэм” тогтоож, хил орчмын есөн тосгоны оршин суугчдыг нүүлгэн шилжүүлсэн юм.
“Терроризмын эсрэг ажиллагааны үеэр үндсэрхэг үзэлтнүүдийн зэвсэгт бүлгүүдийг агаарын болон их бууны цохилтоор устгалаа. Үлдсэн хэсгийг нь Украины нутаг дэвсгэр рүү ухраасан бөгөөд тэднийг бүрэн устгах хүртэл цохилтоо үргэлжлүүлэх болно” гэж ОХУ-ын батлан хамгаалах яамны мэдэгдэлд өгүүлжээ.
Уг мэдэгдэлд Украины талаас нэвтэрсэн 70 гаруй зэвсэгт этгээдийг дөрвөн хуягт тэрэгний хамт устгасан тухай дурдсан байна.
Батлан хамгаалах яам уг халдлагад Украины эрх баригчдыг буруутгажээ.
Тухайлбал Артёмовск (Бахмут) хотоос Оросын зэвсэгт хүчний анхаарлыг сарниулахын тулд Белгород муж руу халдан довтлох ажиллагааг зохион байгуулсан гэж Киевийн эрх баригчдыг буруутгасан байна.
Харин Украины тал Белгород мужид болж буй үйл явдалд ямар ч хамаагүй гэдгээ мэдэгдээд байгаа.
Украины хэвлэлд мэдээлснээр Чөлөөт Оросын Легион, Оросын Сайн Дурынхны Корпус нэртэй Оросын иргэдээс бүрдсэн хоёр зэвсэгт бүлэглэл дээрх халдлагыг үйлдсэн гэнэ.
Өнгөрсөн Бямба гарагт Оросын хувийн зэвсэгт хүчний Вагнер групп Бахмут хотыг бүрэн эзэлснээ зарласан билээ.
Харин Украины тал Бахмутын тулаан дуусаагүй гэж мэдэгдэж байгаа. Тухайлбал өчигдөр буюу Мягмар гарагт “Бахмут хотын тулаан үргэлжилж байна” гэж Украины батлан хамгаалах яам мэдэгджээ.
Эх сурвалж: Reuters