Өчигдөр Сөүл хотод болсон олон улсын хурлын үеэр Өмнөд Солонгосын сангийн сайд улс орныхоо эдийн засгийн өсөлтийн талаар сонирхолтой тоо баримт дурджээ.
Тухайлбал 1962 онд анхны таван жилийн хөгжлийн төлөвлөгөө зарлаж байснаас хойш тус улсын нэг хүнд ногдох дотоодын нийт бүтээгдэхүүний хэмжээ 400 дахин өссөн юм байна.
“Сүүлийн 60 жилийн хугацаанд манай улсын нэг хүнд ногдох дотоодын нийт бүтээгдэхүүний хэмжээ 400 дахин өсжээ” гэж сангийн сайд Чү Кюн Хо хэлжээ.
Тэрбээр цааш нь ярихдаа “Гүн ядуурлын нөхцөлд байсан Солонгосын засгийн газар хөгжил цэцэглэлтийн энгийн бөгөөд тодорхой зорилт тавьж, 1996 он хүртэл долоон удаа таван жилийн төлөвлөгөө, үндэсний хөгжлийн төлөвлөгөө хэрэгжүүлсний үр дүнд дэлхийн хэмжээнд өрсөлдөх чадвартай улс орныг бий болгосон юм” гэсэн байна.
Гэхдээ өнгөрсөн 60 жилийн хөгжил цэцэглэлт дараагийн 60 жилд давтагдах баталгаа байхгүйг тэр энэ үеэр анхааруулжээ.
Тухайлбал геополитикийн зөрчил, дэлхий дахины нийлүүлэлтийн сүлжээний тасалдал, уур амьсгалын өөрчлөлт, инфляцын өсөлт, экспортын бууралт зэрэг Өмнөд Солонгосын эдийн засагт сүүлийн үед тулгарч буй саад бэрхшээлүүдийг Чү сайд дурдсан байна.
Тэрбээр энэ бүхнийг эдийн засагтаа бүтцийн шинэчлэлт хийх замаар даван туулах боломжтойг хэлжээ.
“Солонгосын эдийн засгийн одоо ба ирээдүй” нэртэй энэхүү хуралд тус улсын үе үеийн засгийн газарт ажиллаж байсан сайд нар, Дэлхийн Банкны захирал Анна Берд, Азийн Дэд Бүтцийн Хөрөнгө Оруулалтын Банкны дэд ерөнхийлөгч Людгер Шукнехт зэрэг зочид оролцсон байна.
Эх сурвалж: Korea Times
