Ням гарагт болж өнгөрсөн Туркийн ерөнхийлөгчийн сонгуулийн хоёр дахь шатны санал хураалтад одоогийн ерөнхийлөгч Рэжэп Тайип Эрдоган ялалт байгуулжээ.
Ингэснээр тэр тав дахь удаагаа ерөнхийлөгчөөр сонгогдож, гурав дахь арваныхаа засаглалыг эхлүүлэх гэж байна.
Саналын хайрцгуудын 99.43 хувийг задалсны дараах байдлаар Эрдоган сонгогчдын 52.14 хувь, өрсөлдөгч Кемал Киличдароглу 47.86 хувийн санал тус тус авсныг сонгуулийн ерөнхий хорооны дарга Ахмет Йенер зарлажээ.
Өрсөлдөгчдийн хооронд хоёр сая гаруй саналын зөрүү байгаа тул үлдсэн хайрцгуудыг нээсэн ч үр дүнд нөлөөлөхгүйг тэр мэдэгдсэн байна.
Тавдугаар сарын 14-нд болсон эхний шатны санал хураалтаар нэр дэвшигчдийн хэн нь ч 50-аас дээш хувийн санал аваагүй тул хоёр дахь шатны санал хураалт гол хоёр өрсөлдөгчийн дунд зохион байгуулагдсан юм.
“Ирэх таван жилийн хугацаанд бид улс орныг удирдахаар боллоо. Бурхны тааллаар бид та бүхний итгэлийг хүлээлээ. Дахин улс орныг удирдах боломж олгосон энэ улсын иргэн бүрд би талархал илэрхийлж байна” гэж Истанбул хотод болсон цуглааны үеэр Эрдоган хэлжээ.
Тэрбээр энэ үеэр “бая, бая, бая Кемал” хэмээн өрсөлдөгчөөрөө даажигнахад тэнд цугларсан хүмүүс дургүйцлээ илэрхийлж байв.
Дараа нь нийслэл Анкара хотод ерөнхийлөгчийн ордны гадна ирсэн Эрдоган “Бид бүгд эвлэлдэн нэгдэх ёстой. Бид хэн нэгэнд дургүйцсэн, уурласан зүйл байхгүй. Өнөөдөр хэн ч хожигдоогүй. Бүхэл үндэстнээрээ, 85 саяулаа яллаа” гэж сонгогчдод хэлжээ.
Тэрбээр нэн тэргүүнд инфляцыг бууруулахаа энэ үеэр амласан байна.
Харин түүний өрсөлдөгч Киличдароглу санал хураалтын дүнг сонссоныхоо дараа улс орныхоо ирээдүйд санаа зовж буйгаа илэрхийлжээ.
“Улс орныг хүлээж буй хүндрэл бэрхшээлүүд миний санааг хамгийн их зовоож байна” гэж тэр хэлсэн юм.
Исламын шашны чин сүсэгтэн, консерватив Шударга Ёс, Хөгжлийн Намын тэргүүн 69 настай Эрдоган сүүлийн 20 жил Турк улсыг удирдаж байгаа.
2017 онд тэр бүх нийтийн санал хураалтаар бэлгэдлийн чанартай байсан ерөнхийлөгчийн албан тушаалыг улам хүчирхэг болгож, парламентын засаглалын эрх мэдлийг хязгаарласан юм.
Эрдоганыг ялах сургаар Ням гарагийн орой Туркийн үндэсний валют лирийн ам.доллартай харьцах ханш унаж, шинэ доод түвшиндээ хүрсэн байна.
Лирийн ханш энэ он гарсаар 6 хувь, сүүлийн арван жилийн хугацаанд 90 хувиар унаад байгаа юм.
Эх сурвалж: Reuters
