ОХУ-тай нэгдсэн валюттай болох төлөвлөгөө ойрын үед байхгүйг Беларусийн ерөнхийлөгч Александр Лукашенко өчигдөр мэдэгджээ.
Тэрбээр Даваа гарагт Оросын төв банкны ерөнхийлөгчийг Минск хотод хүлээн авч уулзсан юм.
Оросын рублийг Беларусьт нэвтрүүлэх нь “тийм амархан зүйл биш” гэж Лукашенко энэ үеэр тайлбарлажээ.
Оросын төв банкны ерөнхийлөгч Эльвира Набиуллинатай уулзахдаа Лукашенко “Нэгдсэн валюттай болох нь тийм амархан үйл явц биш. Ойрын үед ингэх төлөвлөгөө бидэнд алга” гэж хэлсэн байна.
Сүүлийн 30-аад жилийн турш Беларусийн Зөвлөлт маягийн эдийн засаг Москвагаас хамааралтай явж ирсэн.
1990-ээд оны дундуур хоёр улс батлан хамгаалах, санхүү, гаалийн нэгдсэн системтэй болох гэрээ байгуулсан ч Москва, Минскийн талуудын ялгаатай үзэл баримтлалын улмаас өнөөдрийг хүртэл хэрэгжиж чадахгүй байгаа.
Лукашенко 2020 оны шударга бус сонгуулиар зургаа дахь удаагаа сонгогдсон ч иргэдийн хүчтэй эсэргүүцлийг Москвагийн дэмжлэгтэй нухчин дарсан юм.
Энэ нөхцөл байдал нь Беларусийг өнөөдөр ОХУ-аас улам хамааралтай болгоод байна.
Өнгөрсөн онд ОХУ-ын цэрэг Украинд халдан довтлоход Лукашенко нутаг дэвсгэрээ ашиглуулж байв. Өрнөдийн хориг арга хэмжээ Беларусийн эдийн засагт хүндээр тусаж байгаа ч хор хөнөөлийг нь ОХУ-ын дэмжлэгтэй сааруулж чадсанаа Лукашенко өчигдөр ярьжээ.
“Оросын эдийн засаг, валютад үзүүлж буй хоригийн нөлөөг Эльвира Набиуллина чадамгай зохицуулж буйг манай дайснууд хүртэл хүлээн зөвшөөрч байна” гэж тэр уулзалтын үеэр зочноо магтсан байна.
“Лукашенко улс орноо Кремлиэс бүрэн хараат болгох хүсэлгүй, Хятад болон Өрнөдтэй яриа хэлэлцээ хийх орон зайг хадгалж үлдэх эрмэлзэлтэй байгаа нь түүний ярьснаас харагдаж байна” гэж Беларусийн хараат бус улс төрийн шинжээч Валерий Карбалевич дүгнэжээ.
Эх сурвалж: Associated Press
