Байгалийн нөөц ашигласны төлбөрийн тухай хуулийн өнгөрсөн оны хэрэгжилтийн талаар Байгаль орчин, аялал жуулчлалын яам (БОАЖЯ)-ны Байгалийн нөөцийн бодлого зохицуулалтын дарга Ц.Уранчимэг өнөөдөр мэдээлэл өглөө.

Байгалийн нөөц ашигласны төлбөрийн тухай хуулиар газар, ой, амьтан, ургамал, ус рашаан ашигласны нөөц зэргээс төлбөрийг төвлөрүүлж буцаад 15-85 хувийг нь байгалийн нөөцөд нь зарцуулах харилцааг зохицуулж байдаг. Нийт орлогын гүйцэтгэлийн 58 хувийг газрын төлбөрийн орлогоос бүрдүүлдэг байна.

Өнгөрсөн жилийн тухайд хуулийн хэрэгжилт 2021 оны гүйцэтгэлээс 17 хувиар нэмэгдэж, 12.4 тэрбум төгрөгөөр өссөн дүнтэй байгаа хэдий ч зохицуулалт алдагдаж, хууль бус зарцуулалт хийгдсэн байна гэдгийг тэрбээр онцолж дараах мэдээллийг өглөө.

БОАЖЯ-ны Байгалийн нөөцийн бодлого зохицуулалтын дарга Ц.Уранчимэг "Нийт 12 аймаг, нийслэлийн санхүү, төрийн сангийн хэлтсийн мэдээгээр байгаль орчныг хамгаалах, нөхөн сэргээх арга хэмжээнд ангиллын зардлын 2022 оны жилийн эцсийн гүйцэтгэлээр 9.5 тэрбум төгрөгийн 60 хувийг амьтан, ус, газар, ой, ургамлын хэмжээнд үлдсэн 40 хувийг хууль бусаар буюу шатахуун, томилолт, техник тоног төхөөрөмжид зарцуулсан зөрчил гарсан нь нотлогдсон" гэв.

Уг асуудалтай холбоотойгоор БОАЖЯ-наас бүх 21 аймгийн Байгал орчин аялал жуучлалын газар, аймаг нийслэлийн засаг дарга нарт зөвлөмж хүргүүлсэн байна.

Түүнчлэн байгаль орчныг хамгаалах арга хэмжээний төсвийн зардлын мэдээллийн санг цахим болгосон. Гэвч энэ цахим мэдээллийн санд аймаг, нийслэлээс дүн мэдээг оруулахдаа Засаг даргын түвшинд хянуулаагүй, тухайн шатны иргэдийн хурлын төлөөлөгчид танилцуулаагүй, байгаль орчныг хамгаалах, нөхөн сэргээх гүйцэтгэлийн мэдээг оруулаагүй зэрэг зөрчлүүд илэрсэн гэдгийг БОАЖЯ-ны Байгалийн нөөцийн бодлого зохицуулалтын дарга Ц.Уранчимэг хэллээ.

Хуулийн хэрэгжилтийн хүрээнд 2022 онд байгалийн нөөц ашигласны төлбөрийн орлогыг улсын хэмжээнд 239.5 тэрбум төгрөгөөр төлөвлөсөн боловч жилийн эцэст 223.8 тэрбум төгрөг буюу 93% нь төвлөрчээ.