Өнөөдөр буюу Мягмар гарагийн өглөө ОХУ-ын нийслэл Москва хот агаарын цохилтод өртөж, хэд хэдэн барилга хөнгөн гэмтсэн байна.

Энэ халдлагаас хэдхэн цагийн өмнө Украины нийслэл Киев хот ээлжит агаарын довтолгоонд өртөөд байсан юм.

Москвад довтолсноо одоогоор хэн ч албан ёсоор хүлээгээгүй байна.

ОХУ-ын батлан хамгаалах яамны мэдээлснээр нийтдээ найман ширхэг нисгэгчгүй онгоцоор (дрон) довтолсныг бүгдийг нь устгаж чадсан гэнэ.

“Тэдгээрийн гурав нь цахилгаан соронзон зэвсгийн нөлөөгөөр удирдлагаа алдаж, зорилтот байдаа хүрэлгүй уналаа. Бусад таван дроныг Москва орчимд байрлуулсан Панцир-С газар-агаар ангиллын пуужингаар устгасан” гэж ОХУ-ын батлан хамгаалах яам мэдээлжээ.

Оросын хууль тогтоогчдын нэг Максим Иванов энэ үйл явдлыг дэлхийн хоёрдугаар дайнаас хойш Москва хот анх удаа агаарын довтолгоонд өртсөн маш ноцтой хэрэг гээд хотын иргэд бодит байдлаас зугтах аргагүй болсныг анхааруулсан байна.

“Нэг бол ганц цохилтоор дайснаа ялах, эсвэл аймхай зан, урвалт шарвалтын ичгүүр танай гэр бүлийг залгих болно” гэж тэр Москвагийн оршин суугчдад хандан мэдэгджээ.

Довтолгооны үеэр хоёр хүн хөнгөн шархдаж, эмнэлгийн тусламж авсныг Москва хотын захирагч Сергей Собянин мэдээлсэн байна.

Оросын хэвлэлүүдийн мэдээлснээр Москва хотын өмнөд Профсоюзная дүүргийн зарим орон сууцнаас иргэдийг нүүлгэн шилжүүлжээ.

Өнөөдөр өглөө Киев хот руу Оросын талаас 20 гаруй дроноор довтолсныг бүгдийг устгаснаа Украины зэвсэгт хүчин мэдээлсэн юм.

Энэ удаа Иранд үйлдвэрлэсэн Шахед дроноор зөвхөн довтолсон ба ганц ч пуужин оролцуулаагүй тухай Киевийн цэргийн тойргоос мэдээлсэн байна.

Устгагдсан дронууд унах үеэр нэг хүн алагдаж, дөрвөн хүн шархадсан тухай Киевийн албаныхан мэдээлжээ.

“Довтолгоо олон талаас, хэд хэдэн давлагаатай явагдсан нь онцгой байлаа” гэж Киевийн цэргийн тойргийн командлагч Сергей Попко сошиал хуудсандаа бичсэн байна.

Тавдугаар сар гарснаас хойш Оросын талаас 17 дахь удаагаа агаарын довтолгоо явуулсан нь энэ байлаа.

Энэ удаа шөнө биш, өдрийн цагаар довтолсон нь ховор тохиолдол байжээ.

Оросын агаарын довтолгоонууд Украины агаараас хамгаалах системийг туйлдуулж, хүн ардын сэтгэл санааг унагах зорилготой гэж Киевийн эрх баригчид тайлбарлаж байна.

Сүүлийн үеийн Оросын пуужин, дронуудын ихэнхийг Украины тал АНУ-ын илгээсэн Patriot агаараас хамгаалах системээр унагаж чадаж байгаа юм.

Даваа гарагийн орой Украины ерөнхийлөгч Володимир Зеленский 100 хувийн амжилттай агаарын довтолгоог няцааж буй зэвсэгт хүчнийхэндээ баяр хүргэж байв.

Эх сурвалж: Reuters