Сагсан бөмбөгийн 3х3 төрлийн долоо дахь удаагийн Дэлхийн Аварга Шалгаруулах Тэмцээн (ДАШТ) Австри улсын Вена хотын Ратхаусплатц цэнгэлдэхэд хоёр дахь өдрөө үргэлжилж байна.
Өчигдөр манай улсын эмэгтэй шигшээ баг Унгарын шигшээ багийн эсрэг 19:21 онооны харьцаатайгаар, хоёр дахь тоглолтоо Чех улсын шигшээ багтай хийж 10:21 оноогоор ялагдав. Ингэснээр С хэсэгтээ сүүлийн байрт бичигдэж байгаа бөгөөд зургаадугаар сарын 1-нд 17:00 цагаас АНУ-ын шигшээ багтай, 19:00 цагаас Канад улсын шигшээ багийн эсрэг тоглосноор хэсгийн шатыг дуусгана.
Харин эрэгтэй шигшээ багийн тоглолтууд өнөөдөр эхэлнэ. Тухайлбал, эхний тоглолтоо Унгарын шигшээ багийн эсрэг Улаанбаатарын цагаар 18:00 үед, хоёр дахь тоглолтоо Швейцарын шигшээ багтай 20:00 цагаас хийнэ.
Мөн зургаадугаар сарын 2-нд 20:00 цагаас Швейцарын багийн эсрэг, 21:25 цагаас Япон улсын шигшээ багтай тоглосноор хэсгийн шатны тоглолтуудаа өндөрлүүлэх юм.
Эрэгтэй шигшээ багийн бүрэлдэхүүн А.Ананд, Д.Дэлгэрням, О.Энхбаатар, Ц.Отгонжаргал нар нэрлэгдсэн бол эмэгтэй шигшээ багт Б.Ариунцэцэг, М.Цэрэнлхам, О.Хулан, Ө.Индра нар багтсан байна.
Эрэгтэй, эмэгтэй дөрвөн хэсэг тус бүрийн эхний гурван шигшээ баг нь хасагдах шатанд шалгарах бөгөөд хэсгээс нэгдүгээр байраар гарвал шөвгийн 16-д шууд шалгарна. Хэрэв хэсгээс хоёр, гуравдугаар байраар гарвал урьдчилсан шатанд тоглох бөгөөд хожвол шөвгийн 16-д шалгарах юм.
