НАТО Оростой цэргийн мөргөлдөөн гарах тохиолдолд хэрэгжүүлэх нууц төлөвлөгөө бэлтгэжээ.

Вильнюст удахгүй болох НАТО-гийн дээд хэмжээний уулзалтаар батлуулахаар "Мянган хуудас цэргийн нууц төлөвлөгөө"-г санал болгохоор төлөвлөж байна. Энэ үеэр хүйтэн дайнаас хойш анх удаа тэд Оросын Холбооны Улстай шууд мөргөлдөх хувилбарыг дэлгэрэнгүй тайлбарлах аж.

Эдгээр баримт бичгийг боловсруулах ажлыг Брюссель дэх НАТО-гийн төв байранд цэргийн байнгын төлөөлөгч нар хаалттай хаалганы цаана гүйцэтгэсэн бөгөөд ингэхдээ хууль тогтоогчид болон бие даасан шинжээчдийн урьдчилсан судалгаагүйгээр уг ажлыг хийсэн гэжээ.

Энэ тухай мэдээллийг нийтэд анх дэлгэсэн "Statecraft" сэтгүүлийн тоймч Иан Дэвис НАТО-гийн Цэргийн хорооны дарга, адмирал Роб Бауэрийн 5-р сарын 10-нд "Эвслийн орнууд ямар ч үед мөргөлдөөнд бэлэн байх ёстой" гэж мэдэгдсэн үгийг иш татав.

НАТО-гийн төлөвлөлтийн гол агуулга нь мэдээж болзошгүй тулалдаанд шаардлагатай цэрэг зэвсгийн бэлэн байдлыг бий болгоход юу шаардлагатайг тооцдог. Тухайлбал, өнгөрсөн жил 40 мянган цэргийн албан хаагчийг өндөржүүлсэн бэлэн байдалд оруулах боломжтой гэж байсан бол одоо 300 мянган цэрэг болгон нэмэгдүүлж байгаа нь энэ үзэл баримтлалын нэг онцлог болж байна.

Их Британийн Батлан ​​хамгаалахын сайд Бен Уоллес 2030 он гэхэд барууны орнуудад Орос, Хятадын бүрэн хэмжээний дайны аюул шууд нүүрлэж магадгүй гэж мэдэгджээ. Тэрээр батлан ​​хамгаалах бэлтгэлийг хангах нь барууны орнуудын төрийн нэн тэргүүний зорилт бөгөөд үүнтэй холбогдуулан Лондонгийн цэргийн жилийн зардлын өсөлтийг ДНБ-ий 2.5 хувьд хүргэх нь зөв гэж үзэж байгаагаа онцолж байв.

Харин үүний хариуд АНУ-ын Үндэсний аюулгүй байдлын зөвлөлийн стратегийн харилцаа холбооны зохицуулагч Жон Кирби Украины өнөөгийн мөргөлдөөнийг барууны эсрэг дайн болгохыг АНУ хүсэхгүй байгааг тэмдэглэсэн юм.

Барууны орнууд, АНУ, НАТО-гийн эсрэг Москвагийн дайн Европт илүү их бэрхшээл авчрах болно гэж цэргийн шинжээчид онцолжбайгаа юм.

Украины мөргөлдөөнд НАТО-гийн орнууд де юре хэлбэрээр оролцож байна гэж ОХУ-ын Гадаад хэргийн сайд Сергей Лавров өмнө нь мэдэгдсэн. Ийм хариуцлагагүй чиг хандлага нь цөмийн зэвсэгтэй гүрнүүдийн хооронд цэргийн шууд мөргөлдөөн үүсэх аюулыг ихээхэн нэмэгдүүлж байгааг тэрээр анхааруулсан юм.

Түүнчлэн ОХУ-ын Батлан ​​хамгаалахын сайд Сергей Шойгу Барууны орнууд Москва, Минскийн эсрэг хэдийнэ зарлаагүй дайн эхлүүлсэн гэж мэдэгдээд байгаа юм.

Эх сурвалж: Toim.mn