Хакерууд Оросын орон нутгийн хэд хэдэн радио станцад нэвтэрч, ерөнхийлөгч Владимир Путиний дуу хоолойгоор худал мэдээ цацсаныг Кремлийн хэвлэлийн төлөөлөгч өчигдөр залруулжээ.

Украины цэргүүд ОХУ-ын хил орчмын гурван мужид халдан довтолсон бөгөөд эдгээр мужуудад онц байдал зарлаж буйг дээрх мэдэгдэлд өгүүлсэн байв.

“Вашингтоны дэмжлэгтэйгээр НАТО-гийн зэвсгээр шүдээ хүртэл зэвсэглэсэн Украины цэргүүд Курск, Белгород, Брянск мужуудын нутаг дэвсгэрт халдлаа” гэж Путиний хоолойгоор зарлажээ.

Мөн дээрх мужуудад онц байдал зарлаж, иргэдийг нүүлгэн шилжүүлэх, бүх нийтийн цэрэг татлага эхлүүлэх шийдвэрүүдийг зарласан байна.

“Энэ бол хакеруудын ажиллагаа байсан. Дамжуулсан бүх мэдэгдэл нь хуурамч. Бид хяналтыг буцааж сэргээсэн” гэж Кремлийн хэвлэлийн төлөөлөгч Дмитрий Песков өчигдөр РИА Новости агентлагийн тодруулгад хариулжээ.

Өчигдөр Белгород мужийн захиргаа, түүнтэй хөрш Воронеж мужийн захиргаа бас хуурамч мэдэгдэл радиогоор цацагдсаныг залруулж, иргэдээ тайтгаруулсан байна.

Хэд хоногийн өмнөөс Кремлийн дэглэмийг эсэргүүцэгч Оросын зэвсэгт бүлэглэлүүд Украинтай хил залгаа Белгород мужид байлдааны ажиллагаа явуулж эхэлсэн билээ. Киевийн эрх баригчид уг ажиллагаатай ямар ч холбоогүйгээ мэдэгдээд тэдгээр бүлэглэлүүдийг Оросын иргэдээс бүрдсэн партизанууд гэж тайлбарласан юм.

Эх сурвалж: AFP