Хувийн зэвсэгт хүчний Вагнер группийн тэргүүн Евгений Пригожин саяхан Оросын армийн офицерыг баривчилснаа сошиал хуудсаараа мэдээлсэн байна.
Сүүлийн саруудад Вагнер групп болон Оросын албан ёсны армийн зөрчил улам гүнзгийрснийг энэ үйл явдал харуулжээ.
ОХУ-ын армийн 72 дугаар бригадын командлагч, дэд хурандаа Роман Веневитинийг баривчилж, байцаах үеэр тэр өөрийн цэргүүддээ Вагнерын цуваа руу буудах тушаал өгснөө хүлээсэн тухай Пригожиний албан ёсны сошиал суваг мэдээлсэн юм.
Уг видео мэдэгдэлд олзлогдсон офицер хувь хүнийхээ хувьд Вагнерт дургүй учраас согтуу үедээ буудах тушаал өгснөө хэлээд уучлал гуйж буйг харуулжээ.
Өнгөрсөн долоо хоногт Вагнерын ангиудыг Бахмут хотоос гарч явах үеэр замыг нь минажуулсан хэрэгт Оросын армийн удирдлагуудыг Пригожин буруутгаж байв.
ОХУ-ын батлан хамгаалах яам Пригожиний мэдэгдэлд ямар нэг тайлбар өгөөгүй байгаа.
Вагнер группээс сүүлд цацсан видео мэдэгдэлд дүрслэгдсэн хүн Веневитин мөн болохыг ойрын төрөл төрөгсөд нь баталсан байна.
Оросын армийн командлагчийг ингэж олны өмнө шившиг болгосон нь Евгений Пригожиний нэр нөлөө асар өндөр болсны илрэл гэж ажиглагчид дүгнэжээ.
“Бүхэл бүтэн бригадын командлагчийг элэглэн тохуурхсан агуулгатай бичлэгийг цацсан нь Евгений Пригожин хүссэн бүхнээ хийдэг хүн болсныг харуулж байна. Тэр хамгийн дээд анги давхаргын хүн болжээ” гэж Оросын батлан хамгаалах чиглэлийн алдартай блоггер, чөлөөнд гарсан офицер Игорь Стрелков энэ тухай Телеграм хуудсандаа бичсэн байна.
Эх сурвалж: The Guardian
