Мягмар гарагт Украины эзлэгдсэн нутаг дэвсгэрт оршдог томоохон усан сангийн далан дэлбэрсэн нь 24 тосгон сууриныг живүүлж, хүмүүнлэгийн ноцтой гамшиг үүсгээд байна.

Лхагва гарагт Нова Каховка далангийн ойролцоох тосгодоос олон мянган хүнийг нүүлгэн шилжүүлэх ажиллагаа үргэлжилжээ.

Даланг дэлбэлсэн хэрэгт Орос, Украины талууд харилцан нэгнээ буруутгаж байгаа.

Украины эрх баригчид нийтдээ 40,000 хүн гамшгийн бүсэд байгаагаас 17,000 хүнийг нүүлгэн шилжүүлснээ мэдээлжээ. Үүнээс гадна Оросын хяналтад байгаа Днепр мөрний зүүн хэсэгт 25,000 орчим хүнийг нүүлгэн шилжүүлэх шаардлагатай байгааг Украин улсын ерөнхий прокурор Андрей Костин мэдээлсэн байна.

Нүүлгэн шилжүүлэх ажил ойрын өдрүүдэд үргэлжлэх гэнэ.

Украины ерөнхийлөгч Володимир Зеленский “бөөнөөр устгах байгалийн зэвсэг” хэрэглэсэнд Оросын талыг буруутгаж, хариу арга хэмжээ авахыг олон улсын хамтын нийгэмлэгт уриалжээ.

Түүний мэдээлснээр үерийн усанд нийтдээ 80 орчим тосгон суурин автахаар байгаа гэнэ.

Гэхдээ далангийн сүйрэл Украины төлөвлөсөн сөрөг давшилтад нөлөөлөхгүйг Зеленский баталжээ.

Энгийн ард иргэдийн амь насанд аюултай тул Женевийн конвенцоор дайны үед усны нөөцийн даланг зэвсгийн зорилгоор ашиглахыг хориглосон байдаг.

Өнгөрсөн оны аравдугаар сард Оросын тал Нова Каховкагийн даланг минажуулж эхэлсэн тухай Зеленский анхааруулж байжээ.

Харин Оросын эрх баригчид даланг Украины талаас олон удаа буудаж сүйтгэсэн гэж мэдэгдээд Киевийн дэглэмийн үйлдсэн гэмт хэргийг шүүхийг дэлхий нийтэд уриалсан байна.

Тухайлбал Кремлийн хэвлэлийн төлөөлөгч Дмитрий Песков далангийн сүйрлийг “Украины талаас зохион байгуулсан хорлон сүйтгэх ажиллагаа” гэж нэрлэжээ.

Зөвлөлт Холбоот Улсын үед буюу 1950-аад оны үед Днепр мөрний дээр байгуулсан Нова Каховкагийн далан нь Крымийн хойгийг цэвэр усаар хангахаас гадна Запорожийн цөмийн цахилгаан станцын реакторуудыг хөргөхөд ашиглагддаг.

Оросын талаас томилогдсон тус станцын захирал Юрый Черничук одоогоор реакторын хөргөлтийн усны нөөцийн түвшин өөрчлөгдөөгүй, эрсдэл үүсээгүйг мэдээлжээ.

Орос, Украины талуудын хүсэлтээр НҮБ-ын аюулгүй байдлын зөвлөл шуурхай хуралдаан зарласан байна.

Далангийн сүйрэл фронтын хоёр талд оршин суудаг хэдэн зуун мянган хүний амьдралд хор хөнөөл учруулахаар байгааг НҮБ анхааруулжээ.

НҮБ-ын ерөнхий нарийн бичгийн дарга Антонио Гутерреш далангийн сүйрлийг “Украинд явуулж буй Оросын эзлэн түрэмгийлэх дайны бас нэг ноцтой үр дагавар” гэж тодорхойлсон юм.

АНУ одоогоор юу болсон талаар тодорхой дүгнэлт хэлэх боломжгүй байгааг Цагаан ордны үндэсний аюулгүй байдлын зөвлөлийн хэвлэлийн төлөөлөгч Жон Кирби өчигдөр мэдэгджээ.

Их Британийн ерөнхий сайд Риши Сунак даланг Оросын тал дэлбэлсэн эсэхийг тагнуулын албад нь судалж байгааг мэдэгдээд тодорхой дүгнэлт хэлэхэд эрт байгааг бас хэлсэн байна.

Европын Холбооны ерөнхийлөгч Шарль Мишел уг сүйрлийг “дайны гэмт хэрэг” гэж нэрлэсэн бол НАТО-гийн ерөнхий нарийн бичгийн дарга Йенс Столтенбэрг “аймшигтай үйлдэл” гэж тодорхойлжээ.

Туркийн ерөнхийлөгч Рэжэп Тайп Эрдоган өчигдөр Украины ерөнхийлөгчтэй утсаар ярихдаа далангийн сүйрлийг мөрдөн шалгах бүх талын оролцоотой ажлын хэсэг байгуулах санал тавьсан байна. Уг хэсэгт дайтагч талуудаас гадна НҮБ, олон улсын хамтын нийгэмлэгийн төлөөлөл оролцох юм байна.

Хятад улсын НҮБ-д суугаа элчин сайд Зань Жүн далангийн сүйрэлд маш их санаа зовж байгаагаа илэрхийлээд дайтагч талуудад олон улсын хүмүүнлэг ёсны хууль дүрмийг дагаж мөрдөх, энгийн ард иргэд болон иргэний дэд бүтцийн байгууламжуудыг хамгаалахад чадах бүхнээ хийхийг уриалжээ.

Эх сурвалж: AFP