Холливүүдийн кинонуудын орлогын чухал хэсгийг бүрдүүлдэг Хятадын зах зээлд Диснейн шинэ бүтээл “Бяцхан Лусын дагина” (The Little Mermaid) амжилт олоогүй нь тодорхой болжээ.
Данийн зохиолч Ханс Христиан Андерсены 1837 онд бичсэн зохиолоор бүтээсэн уг киноны гол дүрийг жүжигчин Холли Бэйли бүтээсэн нь үүний гол шалтгаан болж байна.
Уг кинонд цагаан арьстан гэж нийтээрээ ойлгодог гүнж Ариэлын дүрийг өнгөт арьстан жүжигчин бүтээсэн юм.
Өнгөрсөн сард Хятадын англи хэл дээр хэвлэгддэг төрийн төв хэвлэл The Global Times сонинд Дисней студийн шинэ бүтээлийг шүүмжилсэн нийтлэл гарч байв.
Нийтийн хүртээл болсон сонгодог зохиолыг улс төрийн зорилгоор өөрчилснийг үүнд хурцаар шүүмжилсэн юм.
“Тоо томшгүй олон хүүхдийн бага насандаа сонсож өссөн сайхан үлгэрийг арьс өнгөөр ялгаварлах үзэлтэй тэмцэх талбар болгон хувиргасан” хэмээн уг бүтээлийн талаар бичсэн байна.
Хятадын жирийн иргэд ч лусын дагинын шинэ дүрийг тааламжтай хүлээж аваагүй нь сошиал сувгуудаас харагдаж байгаа.
Хэдийгээр Хятадад арьс өнгөний үзэл АНУ-ынх шиг хурцаар яригддаггүй ч Хятадын гоо сайхны талаар уламжлалт ойлголтод цайвар царай, том нүдийг эрхэмлэдэг нь үүнтэй холбоотой байж магадгүй гэж зарим судлаачид дүгнэжээ.
Тавдугаар сарын 26-нд нээлтээ хийсэн “The Little Mermaid” кино эхний 10 хоногтоо Хятадын зах зээлээс дөнгөж $3.6 саяыг олсон тухай Artisan Gateway байгууллага мэдээлсэн байна.
Диснейн бусад ижил бүтээлүүд ийм хугацаанд $40-$85 саяыг олж байжээ. Тухайлбал өнгөрсөн сард Хятадын кино театруудаар гарч эхэлсэн “Guardians of the Galaxy Vol 3”, “Fast and Furious X” бүтээлүүд ижил хугацаанд $80 сая, $120 саяыг тус тус олоод байгаа юм.
“The Little Mermaid” киноны бүтэлгүйтэл Холливүүдийн уран бүтээлчид Хятадын үзэгчдийн таашаалыг мэдэрч, нийцүүлэх ямар амаргүйг батлан харуулж байна.
Үүнээс гадна Холливүүдийн найруулагчдад бүтээлээ Хятадын засгийн газрын бодлогод нийцүүлэх нь том бэрхшээл болдог юм. Бээжингийн эрх баригчид жилд цөөн тооны гадаадын кино бүтээлд гаргах эрх өгдөг. Тухайлбал 2023 онд гадаадын 39 кино эрхээ авсны 18 нь Холливүүдийн бүтээл байжээ.
2012 онд Sony студи Бээжингийн шаардлагад нийцүүлэхийн тулд “Red Dawn” кинондоо АНУ-ыг Хятадын цэрэг биш Умард Солонгосын цэрэг эзэлж байгаагаар өөрчлөн харуулахаас өөр аргагүй болж байв. Ингэсний үр дүнд тус студи олон сая доллар нэмж зарцуулахад хүрсэн юм.
2016 онд Marvel студи “Doctor Strange” киноных нь “Ancient One” хэмээх дүр анхны хувилбар дээрээ Төвөд хүн байсныг Европ болгон өөрчилсөн нь бас Хятадын эрх баригчдыг бухимдуулахаас зайлсхийсэн хэрэг байжээ.
Эх сурвалж: Aljazeera
