Монголын Үндэсний Олон Нийтийн Телевиз (МҮОНТ)-ийн ажилчид, уран бүтээлчид сүүлийн үед үүсээд буй хууль бус асуудлын талаар өнөөдөр мэдээлэл өглөө.

Энэ үеэр МҮОНТ-ийн хөдөлмөрийн үнэлэмжид гарч буй асуудлын талаар МҮОНТ-ийн Б.Гантигмаа ярив.

Тэрбээр "Манай телевизийн захирал, Үндэсний зөвлөлийн томилгоонд засаг болон намын гар оролцдог. Аль нам төр барьж байна түүний хүн ирдэг. Захирлаар томилогдож буй хүн бүр өөрийн ерөнхий нягтлан, хуулийн зөвлөх, тамгын газрын даргатай ирдэг. Үүнийг өөрийнхөө хулгайг нуух гэсэн оролдлого хэмээн хардаж байна.

Тавдугаар сарын 3-нд хамт олны хурлыг Ерөнхий захирал зарлаж хийсэн. Үндэсний олон нийтийн телевизийн нэгдүгээр сувгийн 24 зураглаач дундаа дөрвөн камертай. Олон нийтийн телевиз ийм байж болох уу.

А.Бүрэнбаатар захирал гурван жил ажиллахдаа юу хийв, ямар сайхан амлалт өгч ирсэн билээ дээ. Баяруудаар цалин нэмнэ хэмээн үргэлж хуурдаг. Бидний хувьд цалин нэмэх хоёрдугаар шаардлага. Нэгдүгээрт уран бүтээл хийх боломжийг бүрдүүлээд өгөөч гэж тавдугаар сарын 3-ны өдрийн хурлыг хийсэн. Үүнд цалин урамшууллын асуудал яригдсан.

Энэ жилээс л эхэлж олон жил ажилласан, ур чадварын нэмэгдэл авдаг болсон. Би 33 жил ажиллаж байна. Үндсэн цалин 760 мянган төгрөг, ур чадварын нэмэгдэл 108 мянган төгрөг. Гэтэл А.Бүрэнбаатарын авч ирсэн санхүү, хуулийн зөвлөхийн ур чадварын нэмэгдэл 650-850 мянган төгрөг.

Бидний сарын цалинг ур чадварын нэмэгдлээр авч байна. Энэ зөв, шударга зүйл үү. Уран бүтээлчдийг урамшуулж, ажиллах нөхцөл боломж, техник технологиор хангаж чадахгүй байж хоёр жил ажилласан хэн нэгэн яагаад тиймэрхүү ур чадварын нэмэгдэл авч байгаа юм.

Би 2-3 жилийн дараа тэтгэвэрт гарна. Энэ телевизэд 1990 онд ажилд орж байлаа. Нийгмээрээ картын бараатай байх үед арай ч ингэж ажиллаж байгаагүй. Ардчилсан чөлөөт, зах зээлийн ингэж ажиллаж байгаа нь үнэхээр шударга зүйл үү. Би үүнийг ярилаа гээд маргааш ч ажлаасаа халагдсан байж магадгүй. Ямар нэгэн зүйл хэллээ гээд өс санадаг гэх үгийг олон залуучуудаас сонсож өөрөө ч мэдэрч байлаа. Би өнөөдөр яваад өгсөн ч харамсах зүйл огт байхгүй. Хамгийн гол нь олон жилийн түүхтэй энэ байгууллагын нэр хүндийг битгий шал арчуулаач.

Хэдхэн цагийн өмнө нэг хүний цалинг 450 мянган төгрөгөөр нэмлээ гэнэ. Өчигдөр шөнийн 03:00 цаг, тавдугаар сарын 3-нд цалин нэмэх боломжгүй, чадахгүй гэж байсан. Үндэсний олон нийтийн телевизийн уран бүтээлчид ямар нэгэн тоглоом уу.

Тэдний хараат байдлаар нэвтрүүлэг, контентоо оруулмааргүй байна. Олон нийтийн эрх ашгийг хангаж биелүүлж чадахгүй байна. Театрын цалин саяхан нэмэгдэж байна. Гэтэл тоймч Ж.Алтангэрэл манай телевизийн хамгийн өндөр цалинг буюу нэг сая төгрөг авч байна. Олон жил, ур чадварын нэмэгдлийг оролцуулаад шүү дээ" хэмээн тайлбарлав.