Саяхан ОХУ-ын батлан хамгаалах яам Украинд байлдаж буй сайн дурын цэрэг дайчдыг өөрийн шууд захиргаанд шилжүүлэхээр болсныг зарласан билээ.

Уг шийдвэр гол нь хувийн зэвсэгт хүчний компани Вагнер группт чиглэсэн гэж ажиглагчид үзэж байгаа.

Оросын батлан хамгаалах яамны удирдлагуудтай байнга арцалддаг болсон Вагнерын тэргүүн Евгений Пригожин шийдвэрийг хүлээж авахгүйгээ мэдэгдсэн юм.

Мягмар гарагт цэрэг, дайны сэдвээр бичдэг нийтлэлчидтэй уулзахдаа ОХУ-ын ерөнхийлөгч Владимир Путин батлан хамгаалах яамныхаа гаргасан санаачилгыг дэмжиж байгаагаа илэрхийлжээ.

“Үүнийг аль болох хурдан хэрэгжүүлэх ёстой” гэж хэлсэн Путин хөлсний болон сайн дурын цэргүүдийг батлан хамгаалах яамны захиргаанд шилжүүлэх нь “эрүүл ухаан, тогтсон практик, хууль тогтоомжид нийцэх арга хэмжээ” гэж тайлбарласан байна.

Батлан хамгаалахын сайд Сергей Шойгугийн гаргасан шийдвэрийн дагуу Украинд байлдаж буй албан ёсны армийн бус зэвсэгт хүчнүүд бүгд энэ сард багтаан тус яамтай гэрээ байгуулах ёстой болж байгаа.

Дээрх шийдвэрийг зарласны дараахан Пригожин “Вагнерын цэргүүд Шойгутай ямар ч гэрээ байгуулахгүй” гэж мэдэгдсэн юм.

Тэрбээр уг мэдэгдэлдээ Шойгуг “ямар ч хэлбэрийн цэргийн хүчийг захирах чадваргүй хүн” гэж тодорхойлсон байна.

Путиний мэдэгдлийн дараа ч Пригожин байр сууринаасаа ухрахгүйг батлан илэрхийлжээ.

“Энэ дайнд биднийг оролцож эхлэх үед хэн ч батлан хамгаалах яамтай гэрээ байгуулах тухай хэлээгүй. Вагнерын дайчдын хэн нь ч ийм ичгүүртэй байдалд ороход бэлэн биш байна. Тиймээс хэн ч гэрээнд гарын үсэг зурахгүй” гэж тэр ярьсан байна.

Пригожин бас ОХУ-ын ерөнхийлөгч Вагнертай “энэ асуудлаар зөвшилцөнө” гэж найдаж байгаагаа хэлжээ.

Зарим ажиглагчид Украины дайнд Вагнерын нөлөөг хязгаарлах шийдвэрийг Путин нэлээд эрт гаргасан байж болзошгүй гэж үзэж байна.

“Шийдвэр энэ оны нэгдүгээр сард гарсан. Вагнерын хүч Бахмутыг эзлэн авсны дараа зарлахаар хүлээж байсан болов уу” гэж R-Politik улс төрийн судалгааны байгууллагын үүсгэн байгуулагч Татьяна Становая ярьжээ.

Олон сар үргэлжилсэн Бахмутыг эзлэх тулаанаа дуусгасны дараа энэ сарын эхээр Пригожин хувийн зэвсэгт хүчнээ фронтын шугамаас татсан юм. Тэрбээр Украины дайны үеэр Оросын талаас олон нийтэд хамгийн их танигдсан хүмүүсийн нэг болоод байгаа.

Үүнийг нь түүний ирээдүйн улс төрийн замналтай холбоотой гэж зарим хүмүүс үзэж байна.

Тухайлбал Украины дайны хувь заяанаас хамааран Пригожиний ирээдүй шийдэгдэж болзошгүй гэнэ. “Тэр өөрийнх нь оролцоогүйгээр Оросын арми ялах боломжгүй нь харагдсаны дараа Путин, Шойгу нарын нэг гуйна гэсэн хүлээлттэй байгаа болов уу. Тэр ийм зүйлийг мөрөөдөж байгаа” гэж Становая тайлбарлажээ.

Эх сурвалж: The Guardian