Украинд байлдаж буй Чеченийн зэвсэгт хүчний удирдагчийн хувь заяа хэрхсэн талаар тодорхой мэдээлэл хомс байна.
ОХУ-ын төрийн Думын гишүүн Адам Делимханов нь Чеченийн засгийн тэргүүн Рамзан Кадыровын ойрын холбоотон юм.
Тэрбээр өмнө нь Украины боомт хот Мариуполийг эзлэх тулаанд Чеченийн зэвсэгт хүчнийг удирдаж байжээ.
Энэ долоо хоногийн эхээр тэр ОХУ-ын хилийн Белгород мужийн захирагчтай уулзаж, хилээр нэвтэрсэн зэвсэгт бүлэглэлүүдтэй тэмцэх талаар ярилцсанаа мэдээлж байв.
Дараа нь Делимхановын хаана байгаа нь тодорхойгүй болсон юм.
Рамзан Кадыров “хайрт ах”-ыг нь олж өгсөн хүнийг шагнахаа амлаж, бүр Украины тагнуулын албанаас хүртэл тусламж хүссэн байна.
Үүний дараа Делимханов амьд байгаа тухай янз бүрийн эх сурвалжууд мэдээлж эхэлжээ.
Тухайлбал Думын спикер Вячеслав Володин түүнтэй утсаар ярьсныг, эрүүл саруул байгааг өөрөөс нь сонссон тухай Думын гишүүн Дмитрий Кузнецов мэдээлсэн байна.
Үүний дараа Кадыров дахин мэдэгдэл хийхдээ “Худал цуурхал байсныг би эхнээс нь мэдэж байлаа. Гэхдээ би тэдний, гол нь Украинчуудын, арга ямар хэмжээнд доройтсоныг харуулахын тулд мэдээгүй царайлахаар шийдсэн юм” гэж ярьжээ.
Кремлийн хэвлэлийн төлөөлөгч Дмитрий Песков үйл явдлын өрнөлийг анхааралтай ажиглаж, юу болсныг тодруулахаар ажиллаж байгаагаа сэтгүүлчидтэй уулзах үеэр мэдээлсэн байна.
Эх сурвалж: BBC