Бээжин хотод хоёр өдрийн хугацаатай айлчилж буй АНУ-ын төрийн нарийн бичгийн дарга Энтони Блинкенийг өчигдөр Хятадын төрийн тэргүүн Ши Жиньпин хүлээн авч уулзжээ.
Ингэснээр харилцаа нь түүхэн доод хэмжээндээ хүртэл муудаад байгаа дэлхийн тэргүүлэх хоёр гүрний хооронд дээд түвшний харилцаа холбоо сэргэж байна.
Ши Жиньпин талуудын харилцаанд ахиц дэвшил гарсныг уулзалтын дараа мэдэгдсэн бол Блинкен цаашдын яриа хэлэлцээг эхлүүлэх зам нээгдсэнийг мэдэгджээ.
Гэхдээ талуудын хооронд санал нийлэхгүй олон асуудал нээлттэй хэвээр үлдсэнийг тэр онцолсон байна.
Тяньаньмэний талбайн Ардын Их Хурлын ордонд 35 минут үргэлжилсэн уулзалтын дараа сэтгүүлчидтэй уулзахдаа Блинкен “Дээд түвшний харилцаа холбоо нь сөргөлдөөнийг хариуцлагатайгаар зохицуулж, өрсөлдөөнийг зөрчил тэмцэлд хүргэхгүй байх хамгийн сайн арга болохыг би онцоллоо. Хятадын тал ч бас үүнтэй санал нийлж байгаагаа илэрхийлсэн. Талууд харилцаагаа тогтворжуулах дээр санал нэгдлээ” гэж ярьжээ.
Америк-Хятадын харилцаа өмнөх ерөнхийлөгч Дональд Трампын засаг захиргааны үеэс эхлэн хурцадсан юм.
Сүүлд Тайвань арлыг хүчээр өөртөө нэгтгэх бодлогыг Бээжингийн эрх баригчид ил тод зарлах болсон нь харилцааг улам бүр муутгаад байгаа.
Энэ оны эхээр Хятадын тагнуулын зориулалттай гэгддэг агаарын бөмбөлгийг АНУ-ын нутаг дэвсгэр дээр буудаж унагасан нь нөхцөл байдлыг нэмж дордуулсан юм.
Энтони Блинкен нь сүүлийн тав орчим жилийн хугацаанд Хятадад айлчилсан АНУ-ын гадаад бодлогын анхны тэргүүн болж байна.
Ши Жиньпинтэй уулзах үеэр Украинд явуулж буй Оросын дайн, Америкийн фентанилын хямрал, Тайвань, Умард Солонгосын асуудал, Хятад дахь хүний эрхийн нөхцөл байдал зэрэг олон сэдвийг хөндсөн тухай АНУ-ын төрийн департамент мэдээлжээ.
“Талууд зарим асуудлаар тохиролцоонд хүрч, ахиц дэвшил гаргасан нь уулзалтын чухал үр дүн байлаа” гэж бас мэдэгдсэн байна.
Бээжин хотод Ням гарагт Хятадын гадаад хэргийн сайд Чинь Гантай хэлэлцээ хийсэн Блинкений айлчлалын хөтөлбөрт Ши Жиньпинд бараалхах төлөвлөгөө байгаагүй юм.
Төлөвлөгдөөгүй уулзалтыг ердөө нэг цаг орчмын өмнө зарлажээ.
Блинкенийг Ши Жиньпин хүлээн авч уулзсан нь Хятадын тал АНУ-тай харилцаагаа тогтворжуулах хүсэл сонирхолтой байгаагийн илрэл гэж ажиглагчид үзэж байна.
Айлчлалын үеэр талуудын харилцааг сайжруулах чиглэлд томоохон ахиц дэвшил гарах хүлээлт анхнаасаа байгаагүйг мэдэгдсэн Блинкен ямартай ч дээд түвшний харилцаа холбоог сэргээж чадсан нь чухал үр дүн болохыг онцолжээ.
“Ахиц гаргах амаргүй. Хугацаа шаардагдана. Нэг айлчлал, нэг уулзалтаар шийдэгдэх асуудал биш” гэж тэр сэтгүүлчидтэй уулзахдаа хэлсэн байна.
Эх сурвалж: BBC
