6-р сарын 19-ний үдээс хойш БНХАУ-ын дарга Ши Жиньпин тус улсад айлчилж буй АНУ-ын төрийн нарийн бичгийн дарга Энтони Блинкентэй уулзав.
Ши Жиньпин энэ үеэр хэлэхдээ, "Дэлхий дахин хөгжиж, цаг үе өөрчлөгдөж байна. Ерөнхийдөө тогтвортой Хятад, Америкийн харилцаа дэлхий дахинд хэрэгтэй байна. Хятад, Америк хоёр зөв зохицож чадах эсэх нь хүн төрөлхтний ирээдүйн хувь заяанд хамаатай. Өргөн уудам дэлхий ертөнц нь Хятад, Америкийн тус тусын хөгжил, хамтын цэцэглэлтийг бүрэн багтааж чадна. Хятадын ард түмэн Америкийн ард түмний нэгэн адил өөрийгөө хүндэлж, өөрөө хүчирхэгждэг ард түмэн бөгөөд бүгд илүү сайн сайхан амьдралыг хөөцөлдөх эрхтэй, хоёр орны нийтлэг ашиг сонирхлыг нухацтай чухалчлан үзэх ёстой, тус бүрийн амжилт нь харилцан боломж авчрах төдийгүй заналхийлэл болохгүй. Одоогийн байдлаар, олон улсын хамтын нийгэмлэг Хятад, Америкийн харилцааны өнөөгийн байдалд ерөнхийдөө санаа зовниж, хоёр орны хооронд зөрчил мөргөлдөөн, сөргөлдөөн гарахыг хүсэхгүй байна, мөн Хятад, Америкийн аль нэг талд орох хүсэлгүй байна, Хятад, Америк энх тайвнаар зэрэгцэн оршиж, найрсаг хамтын ажиллагаа өрнүүлэхийг тэд хүсэн хүлээж байгаа. Хоёр орон түүх, ард түмэн, дэлхий дахинд хариуцлагатай байр сууринаас хандаж, Хятад Америкийн харилцааг сайтар зохицуулж, дэлхийн энх тайван хийгээд хөгжилд хувь нэмрээ оруулж, үймээн самуунтай дэлхийд тогтвортой, тодорхой, бүтээлч хувь нэмэр оруулах ёстой" гэжээ.
Харин Энтони Блинкен Ерөнхийлөгч Байденийн мэндчилгээг Ши Жиньпинд уламжлаад: "АНУ, Хятадын хоёр талт харилцааг сайтар зохицуулах талаар хоёр орон үүрэг хариуцлага хүлээсэн. Энэ нь Америк, Хятад төдийгүй дэлхийн ашиг сонирхолд нийцнэ гэдэгт Ерөнхийлөгч Байден итгэдэг. Хоёр орны төрийн тэргүүний Бали арал дахь уулзалтаар тохиролцсон мөрийн хөтөлбөрт эргэн орохыг Америкийн тал эрмэлзэж байна. АНУ Ерөнхийлөгч Байдены амлалтуудыг даган мөрддөг, "шинэ хүйтэн дайн" эхлүүлэхийг эрэлхийлдэггүй, Хятадын тогтолцоог өөрчлөхийг эрмэлздэггүй, мөн холбоотнуудынхаа харилцааг бэхжүүлэх замаар Хятадыг эсэргүүцэхийг эрмэлздэггүй, бас "Тайванийн тусгаар тогтнол"-ыг дэмждэггүй бөгөөд Хятад улстай мөргөлдөх зорилгогүй, харин Хятад улстай дээд түвшний харилцаа өрнүүлж, саадгүй харилцаа холбоогоо хэвээр хадгалж, санал зөрөлдөөнөө хариуцлагатайгаар хянан зохицуулж, яриа хэлцэл, солилцоо, хамтын ажиллагаа өрнүүлэхийг хүсэж байна" гэсэн байна.
Төгсгөлд нь Ерөнхийлөгч Байденд мэндчилгээ дэвшүүлэхийг Ши Жиньпин Блинкенээс хүссэн аж.
Г.Бямба
Sonin.mn
