Хэрвээ Украины арми Өрнөдийн орнуудын илгээсэн HIMARS, “Storm Shadow” зэрэг өндөр нарийвчлалтай пуужингуудаар Крымийн хойгт довтолбол хариуд нь Киев дэх “шийдвэр гаргах төвүүд”-ийг устгахаа ОХУ-ын батлан хамгаалахын сайд Сергей Шойгу анхааруулжээ.
Мягмар гарагт хийсэн мэдэгдэлдээ тэр ийм зэвсгээр Крымийн байрлалуудад довтлох нь “мөргөлдөөнд Өрнөдийн орнууд шууд оролцож эхэлсний илрэл болох бөгөөд Украины нутаг дэвсгэр дэх шийдвэр гаргах төвүүдэд хариу цохилт өгөх шалтаг болно” гэж мэдэгдсэн байна.
Шойгугийн хэлсэн “шийдвэр гаргах төвүүд” гэдэгт Украины ерөнхийлөгчийн ордон, тагнуулын байгууллагын төв байр зэрэг орж байгаа бололтой.
ОХУ-ын эрх баригчид өмнө нь бас ийм сүрдүүлэг хийж байсан. Гэхдээ энэ удаа Украины армийн сөрөг давшилт зүүн болон өмнөд фронтын дагуу эхэлсэн цаг үетэй давхцаж байна.
Украины эрх баригчид саяхан эхэлсэн сөрөг давшилтаараа Оросын цэрэгт эзлэгдсэн бүх газар нутгаа, түүний дотор Крымийн хойгийг чөлөөлөх зорилготойгоо тунхагласан.
Өнгөрсөн долоо хоногт ОХУ-ын ерөнхийлөгч Владимир Путин хөрш Беларусийн нутаг дэвсгэрт тактикийн цөмийн зэвсэг байрлуулснаа зарласан юм. Энэ нь Зөвлөлт Холбоот Улс задарснаас хойш Кремлийн эрх баригчид анх удаа цөмийн зэвсгээ гадаадад байрлуулсан тохиолдол болж байна.
Шведийн Батлан Хамгаалах Судалгааны Агентлагийн шинжээч Мариа Энквист өчигдөр хэвлэлд ярихдаа “Оросын хуурай замын зэвсэгт хүчин хүнд байдалд орохын хэрээр цөмийн зэвсэг хэрэглэх магадлал нэмэгдэж байна” гэж анхааруулжээ.
Кремлийн бодлогыг дэмжигч, гадаад бодлого судлаач Дмитрий Тренин өчигдөр сошиал хуудсандаа “цөмийн зэвсэг хэрэглэх нь онол төдий зүйл биш, бодитой болохыг харуулах” зорилгоор Орос улс цөмийн дайны номлолоо шинэчлэх шаардлагатай тухай бичсэн байна.
“Одоо өрнөж буй мөргөлдөөний үеэр цөмийн зэвсэг хэрэглэх боломжтойг нуугаад хэрэггүй” гэж тэр бичжээ.
Өчигдөр бас НАТО-гийн ерөнхий нарийн бичгийн дарга Йенс Столтенбэрг “Бид бүгд дайныг дуусгахыг хүсэж байна. Гэхдээ энх тайвныг тогтоохын тулд дайн шударгаар дуусах ёстой. Оросын хүссэнийг зөвшөөрөх замаар дайныг зогсоох нь энх тайван байдал тогтоох гэсэн үг биш” гэж мэдэгдсэн юм.
ОХУ-ын гадаад хэргийн сайд Сергей Лавров тэр дор нь уг мэдэгдэлд хариу өгсөн байна. “Энэ нь тэд тулалдахыг хүсэж байна гэсэн үг. Тэгвэл хүслээр нь болъё. Бид бэлэн байна” гэж тэр хэлжээ.
Эх сурвалж: The Guardian