Европ тивийн хамгийн том өдөр тутмын сонинд тооцогддог Германы Bild олон тооны ажлын байраа хиймэл оюуны системээр орлуулах болсныг өчигдөр зарлажээ.
Энэ нь тус сонины 100 сая еврогийн зардал танах төлөвлөгөөний нэг хэсэг юм байна.
“Дижитал ертөнцөд хиймэл оюун ухаан, автоматжуулсан процессоор гүйцэтгэдэг болсон ажлын байруудыг цомхотгох болсноо дуулгахад харамсалтай байна. Ийм шалтгаанаар редакторууд, хэвлэх үйлдвэрийн ажилчид, дэд редакторууд, засварлагчид, фото редакторууд цомхотголд хамрагдахаар боллоо” гэж Bild сониныг эзэмшигч Axel Springer SE компаниас ажилтнуудад илгээсэн захидалд бичжээ.
Энэ оны хоёрдугаар сард тус компанийн гүйцэтгэх захирал Матиас Дюфнер байгууллагаа “цэвэр дижитал медиа компани” болох гэж байгааг зарлаж байсан юм.
ChatGPT зэрэг хиймэл оюуны систем “хараат бус сэтгүүлзүйг урьд өмнө хэзээ ч байгаагүйгээр сайжруулах” чадвартайг тэр онцолж байжээ.
Тухайлбал энгийн ажлуудыг хиймэл оюунаар гүйцэтгэж, эрэн сурвалжлах нийтлэл зэрэг илүү нарийн мэргэжлийн ур чадвар шаардсан ажлуудыг л хүн хийдэг болох ирээдүйтэйг Дюфнер ярьж байв.
Bild сонин яг хэдэн ажилтнаа хиймэл оюунаар солих болсныг дэлгэрүүлж мэдээлээгүй байна.
Тус сониноос гадна Их Британийн Daily Mirror, Daily Express зэрэг хэвлэлүүд саяхан хиймэл оюуны системийг ашиглах боломжийг судалж эхэлснээ мэдээлсэн юм.
ChatGPT платформ нь хэрэглэгчийн оруулсан энгийн текстийг мэргэжлийн түвшний нийтлэл, эссе, зохиол, ажил горилох өргөдөл гэх мэт материал болгон боловсруулдаг болоод байгаа билээ.
Эх сурвалж: The Guardian
