Өчигдөр ОХУ-ын төрийн Дум ялтан, ял эдэлж байсан хүмүүс, сэжигтнүүдэд цэргийн алба хаах замаар гэмт хэргийн түүхээ арилгуулах боломж олгох хуулийн төслийг хэлэлцэж дэмжжээ.

Ийм загварыг Оросын хувийн зэвсэгт хүчний компани Вагнер Групп өмнө нь хэрэглэж байсан бол одоо албан ёсны арга хэрэгсэл болж, хуульчлагдах гэж байна.

Хуулийн төслийг одоо парламентын дээд танхим хэлэлцэж, дэмжсэний дараа ерөнхийлөгч баталснаар хүчин төгөлдөр болох юм.

Шинэ хуулийн дагуу гэмт хэрэгтнүүд цэргийн албаа хааж дуусгасны дараа, эсвэл төрийн одон медаль хүртэх гавьяа байгуулсан тохиолдолд цагаадахаар болж байна.

Мөн тулаанд шархадсан болон тэтгэврийн насанд (65) хүрсэн тохиолдолд цэргийн алба хааж дуусахаасаа өмнө цагаадах нөхцөл тусгажээ.

Бас цагаадах боломжгүй гэмт хэргүүдийг хуулийн төсөлд жагсаасан байна. Тухайлбал тагнуулын үйл ажиллагаа явуулсан, эх орноосоо урвасан, террорист халдлага үйлдсэн, бэлгийн гэмт хэрэг үйлдсэн бол цэргийн алба хаасан ч цагаадахгүй ажээ.

Сэжигтнүүдийн хувьд санаатай үйлдсэнд сэжиглэгдэж буй хэрэг нь тав хүртэл жил, санаандгүй үйлдсэн хэрэг нь 10 хүртэл жилийн ялтай бол хуульд хамрагдахаар тусгасан байна.

Харин хуулийг батлагдсан өдрөөс хойш гэмт хэрэг үйлдсэн хүмүүст үйлчлэхгүй ажээ.

Саяхан ОХУ-ын ерөнхийлөгч Владимир Путин дайнд явах хүсэлтээ илэрхийлсэн хоригдлуудад өршөөл үзүүлж эхэлснээ ярьж байв.

Вагнер групп хэдэн хоригдол элсүүлсэн тухай албан ёсны тоо баримт байхгүй байгаа. Гэхдээ Оросын шоронгуудын хоригдлын тоо сүүлийн саруудад 20,000 гаруйгаар буурсан гэх баримт бий.

Вагнерт элссэн хоригдлуудын нэлээд хэсэг нь Бахмутын тулаанд амь үрэгдсэн гэж үздэг.

Эх сурвалж: The Moscow Times